Zanin aṭangin IPL16 ṭan dawn

TATA Indian Premier League vawi 16-na chu zanin aṭangin khelh ṭan a ni dawn a, Narendra Modi Stadium-ah champion lai Gujarat Titans-in record nei ṭha Chennai Super Kings an mikhual ang.

IPL16-ah hian team 10 - Chennai Super Kings, Delhi Capitals, Punjab Kings, Kolkata Knight Riders, Mumbai Indians, Rajasthan Royals, Royal Challengers Bangalore, Sunrisers Hyderabad, Lucknow Super Giants leh Gujarat Titans te an awm a, stadium 12-ah an khel dawn.

Tun ṭum inelna hawnna leh kharna hi Narendra Modi Stadium, Ahmedabad-ah khelh tur a ni a, final hi May 28, 2023-a khelh tura ruahman a ni.

Sum a tam

IPL an an sawi apianga sawi hmaih theih loh chu sum tam thu hi a ni a, club pakhat pawhin crore tel tak meuh meuhin sum an ti che. Tun season-a hlawh tam ber tur chu Sam Curran a ni a, Punjab Kings-in English all rounder hlawh atan hian nuai 1850 an seng.

Club 10 zinga sum seng tam ber Mumbai Indians-in player hlawh atan hian crore 94.95 an seng a, seng tlem ber Punjab Kings-in crore 82.80 an hmang. Club pakhat hian crore 95 an hmang thei a, Mumbai hian nuai nga chauh an hmang bang.

Gujarat Vs Chennai

Inkhelhna hmun tur Narendra Modi Stadium-ah hian T20 international match vawi 10 khelh a ni tawh a, bat hmasa zawk ṭum ruk an chak. He stadium-ah hian target umtu zawk nih a fuh lo a, T20I-a target an tlin san ber chu 166 chauh a ni.

Hemi a nih avang hian ṭhumvawra chak a pawimawh dawn a, Hardik Pandya leh Mahendra Singh Dhoni ten thutlukna an siam thiam a pawimawh dawn. Season liam ta khan Dhoni hian Ravindra Jadeja hnenah captain nihna a hlan chhawng a, a fuh lo.

Kuminah erawh Dhoni-a'n thuneihna a rawn chelh leh ta a, India captain hlui hi ram tan khel tawh lo mah se hruaitu ṭha a nih miau avangin an la dah sang reng. Chutihrualin pawisa thapna lamah chuan champion lai Gujarat hi dinhmun ṭha zawk tura dah a ni.

Gujarat hian foreign player ṭha Kane Williamson, Matthew Wade, Rashid Khan te an kawl a, Indian player zingah Shubman Gill, Hardik Pandya leh Mohammed Shami te an kawl bawk.

Mahse, Chennai hian Devon Conway, Ben Stokes, Moeen Ali leh Jadeja te an nei ve tho a, CSK vanduaina erawh Stokes khup na a dam chian loh avangin a vawm tel thei dawn lo.