Inter Dist Junior Boys Quarterfinal khel tur a chiang ta

Mizoram Inter District Junior Boys Football C'ship 2023 group stage chu nimin khan Kolasibah khelh zawh a ni a, quarterfinal khel tur a chiang. April 1, Inrinni hian quarterfinal hi khelh a ni ang.

Lawngtlai, Mamit, Champhai leh Saitual te chu an awmna group ṭheuhah pakhatna an ni a; Aizawl, Siaha, Khawzawl leh Kolasib te chuan pahnihna nichungin knockout stage an lut ve bawk.

Group A-ah Champhai an tling chiang tawh a, Kolasib-in Lunglei hnehin an tling ve bawk. Group B-ah Saitual-in Siaha leh Hnahthial an hneh ve vein hmahruaitu an ni a, Hnahthial 5-0 a hnehtu Siaha chu pahnihna an ni.

Group C-ah Lawngtlaiin an theihna tak an lantir a, Serchhip chu 7-0 ngawtin an sawp a, hmahruaitu an ni ta daih. He group-a team pathum hi vawi khat ṭheuh an chak vek a, an point hmuh a inan vek avangin Serchhip an tla a, Khawzawl an vannei ta thung.

Group D-ah Aizawl leh Mamit chauh an awm a, ṭum hnih an inhnehtawk avangin penalty shootout hmangin group pakhatna tur a zawng. Mamit hi an vannei ta zawk.

Inelna hi kum 17 hnuai lam inelna a ni a, January 1, 2007 leh December 31, 2009 inkar chhunga piangte chauh an tel thei a ni.