Vanglaini Biangbiakna: Mizoram tan kan inhawng reng - Captain Vijay Kumar

Mizoram Football Association Golden Jubilee lawmna kal zelah Mizoram team chuan vawiin hian Indian Navy nen exhibition match an khel dawn a, Kolasib District Football Association chuan he match hi a thleng dawn.

Kolasib Sports Stadium, Kolasib-ah match hi khelh a ni dawn a, Mizoram team-ah hian Mizo football legend S. Malsawmtluanga leh ATK Mohun Bagan midfielder K. Lalṭhathanga (Puitea) te an tel dawn a, chawhnu dar 2:30-ah programme ṭan a ni ang.

Inkhel en duh tan a hmunah ticket Rs. 50-in a lei theih a, Mizoram team aiawh hian Kolasib aṭanga Mizoram Premier League khel hmasa ber tur Project Veng FC chu an inlan dawn a, PFC manager Samuel Lalpekhlua chuan, "Kan inbuatsaihna a ṭha tawk a, hnehna kan chan theih ka ring," tiin Vanglaini a hrilh.

Mizoram leh Navy inkhel tur avanga lo zin Indian Navy Sports Control Board secretary captain (IN) Vijay Kumar chu Vanglaini chuan biangbiakna a nei a, Vijay Kumar chuan, "Kan ṭhat dan berin kan lokal," a ti a, hnehna chan ngei an tum.

Kawng a inhawng

Indian Navy hian exhibition match hi an ti mai mai lo a, tlawm tur ringawta Mizoram rawn zin an duh lo - an player neih ṭhat leh coach neih ṭhate nen Mizoram an rawn pan a, Navy team atan player an zawng nghal dawn bawk.

Mizo player-te tan ṭan a ngai tihna a ni a, tun hi an tan hun ṭha a ni. Navy-ah hian professional player tan pawh luh theih a ni a, tuna Indian player langsar zingah Mumbai City centre back ṭha Mehtab Singh leh Hyderabad FC winger Nikhil Poojary te chu Navy an ni.

Captain Vijay Kumar chuan, "Navy chuan kan player-te tana ṭha ber zel kan ngaihtuah a, an kawng dal kan tum lo. Mehtab leh Poojary-te pawhin Navy-a an hlawh ngai reng la chungin professional football an khel thei a ni," a ti.

Kumar chuan, "Mizo professional player-te pawhin an duh phawt chuan Navy an zawm thei," a ti a, vawiin inkhel tur chu Navy player tur zawn nan an hman nghal tur thu a sawi bawk.

Engtin nge?

Indian Navy sports-a an hotupa chuan professional footballer-ten Navy an zawm theih chhan chu India rama football league-te chu All India Football Federation (AIFF) hriatpui an nih vang, a nih thu a sawi.

Kumar chuan, "ISL leh I League-ah Navy player pariat an awm a, Navy ni chunga league an khelh theih chhan chu an khelhna league-a thuneitu chu India rama football thuneitu sang ber AIFF a nih vang a ni," a ti.

A vanglaia basketball khel ṭhin Vijay Kumar chuan, "Boxing pawh ni se, Boxing Federation of India-in a hriatpuina hnuaia tournament-ah an inhnek a nih chuan an kawng dal kan tum ngai lo," a ti a, infiammite tana a ṭha ber zel an ngaihtuah thu a sawi.

Indian Navy aṭang hian an thuneitu sangte leh football coach bakah infiamna danga an coach langsar tak takte pawh an lo kal a, Thawhlehni zana basketball inelna sang Mizoram Super League final pawh kha a hmunah an en a ni.

Kawng dangah

Vijay Kumar hian Navy-a Mizo infiammite tan kawng a inhawn thu sawi zuiin, International/Junior emaw Senior National Championship/Senior State Championship/All India University Championships-a inlan tawhte chu Navy-ah sports quota in an lut thei.

Kumar chuan, "Kum tinin, thla ruk danah zel sports quota hian infiammite chu Indian Navy-ah lakluh ṭhin an ni," a ti a, "Coach-te chu hmun hrang hrangah zinin an player duh zawng an thlang a, advertisement chhuah veleh an player thlante chu dilna thehlut ve turin an hrilh a, kan lo la ta ṭhin a ni," a ti.

Indian Navy Sports lama hotupa chuan, "Infiammi chu ṭha viau mah se state aiawha la inlan lo a nih chuan a lak ngawt theih loh. Entirnan, hna pangngaiah pawh a dil thei chin tur ruahman a ni ṭhin a, mi pakhat fel leh thluak ṭha tak awm mah se pawl 12 pass chinin an dil theih ang kha pawl 12 a pass loh miau chuan a dil thei lo a ni," a ti a, kalphung fel tak an neih thu a sawi.

Vijay Kumar chuan, Indian navy chuan trial pawh an buatsaih ṭhin thu sawiin, infiamnaa hming chher bik leh hlawhtling bikte tan chuan direct-a luh dan kalkawng pawh an neih thu a sawi bawk.

Mizoram tan

Vijay Kumar chuan football chauh ni lo, boxing, wrestling, basketball leh infiamna dang dangah pawh Mizoram tan an inhawn thu a sawi a, "Min rawn sawm a nih phawt chuan Mizoram tan kan inhawng reng a ni," a ti a, Mizoram chu nuam a tih thu a sawi bawk.

Indian Navy Sports Control Board Secretary chuan, "Imphal-ah pawh boxing fight night kan buatsaih zo chiah a, kan boxer neih ṭhat ber berte nen kan kal a, hun hlimawm tak kan hmang," a ti a, Mizoram boxing tan pawh an inhawn thu a sawi.

Vijay Kumar chuan, "Infiamna dang dang pawhin min sawm phawt chuan kan inhawng reng a ni," a ti a, Navy chuan hmun hrang hranga anmahni sawmtute chu thawhhona ṭha tak an neihpui ṭhin thu Vanglaini a hrilh.

Captain Vijay chuan, "Tun hi a vawi khatna chauh a ni a, kan la rawn kal lehin ka ring," a ti a, Mizoramah infiammi ṭha tak tak hmuhchhuah an beisei thu a sawi.