Premier League Hall of Fame : Sir Alex Ferguson leh Arsene Wenger an la lut

Premier League mana-ger ropui pahnih, an vanglaia English football boruak ti sanga inelna hmuhnawm chhawp chhuaktute - Sir Alex Ferguson leh Arsene Wenger te chu Premier League Hall of Fame huangah seng luh an ni.

Mi hmingṭha, chawimawi phu leh mi ropui bikte tan Premier League Hall of Fame hi kum 2021 khan siam a ni, a tir lamah player an lalut hmasa. Manager zingah chuan Sir Alex leh Wenger te hi an lakluh hmasak ber an ni - an sulhnu enin an phu hle.

EPL Hall of Fame an tih tirh khan - Alan Shearer leh Thierry Henry te pahnih chu dahluh nghal an lo ni tawh. A hnuah mipui vote thlak theihna siam a ni a, David Beckham, Dennis Bergkamp, Eric Cantona, Roy Keane, Frank Lampard leh Steven Gerrard te an senglut leh bawk.

A hnu lamah Sergio Aguero, Didier Drogba, Vincent Kompany, Wayne Rooney, Peter Schmeichel, Paul Scholes, Patrick Vieira leh Ian Wright te chu dah luh an lo ni leh tawh bawk a, English football huanga hmingṭha zualte an la lak luh belh zel ang.

Nomawi 13

Premier League nomawi chawi harsat zia hriat duh chuan Liverpool ṭantute zawh mai a fuh ang, thil awlsam a ni lo. Sir Alex Ferguson hian EPL title hi ṭum 13 ngawt a la thei - Manchester United manager awm tawh zinga ropui ber tia sawi ngam a ni.

Ferguson hian kum 1986 aṭanga 2013 inkar khan Man United hi a enkawl, a zawna vawi thum champion hi ṭum thum hnih a nei. A player enkawl zingah pawh mi paruk ngawt chu EPL Hall of Fame-ah hian lakluh an lo ni tawh.

Kum 81 mi Ferguson chuan, "Premier League Hall of Fame huanga ka tel ve hi ka lawm, ka tan chuan hetiang chawimawina hi a hlu hle. Manchester United enkawl kha mimal hna a ni satliah lo a, player leh coaching staff hna thawh vanga hlawhtling kan ni.

"Ka hna chu Man United ṭantute hlimna siamsak a ni a, keimah chauh ni loin player zawng zawng khan sang tak kan thleng thei a ni tih hre turin an rilruah ka tuh ṭhin a," tiin a hna thawh chhan leh thawh dan a sawi lang.

Season 27 chhung Man-chester United a enkawl lai khan match 810 an khelh zinga 528-ah hnehna an chang - Manager of the Season lawmman vawi 11 dawngin, Manager of the Month Award pawh ṭum 27 a dawng hial a ni.

Hneh theih loh

Premier League champion thei manager an awm nual, player zinga EPL title chawi thei phei chu tam tak an ni tawh. Mahse, tlawm miah loa champion thei manager pakhat chiah a la awm, a hming chu Arsene Wenger a ni.

Wenger hian Arsenal hi season 22 chhung a enkawl a, league nomawi vawi thum a chawi pui. EPL title a lak zat aṭanga chhut chuan a ropuina hi sang uchuak tak a ni hran lo - mahse Gunners siam len dan erawh sum leh nomawi nena teh chi a ni lo.

Kum 73 mi Wenger hian Arsenal hi match 828 a kaihruai a, ṭum 476 hnehna chan puiin vawi 199 chu an khingpuite nen an inhnehtawk thung. A sulhnu an sawi apiangin 2003/04 season-a ‘The Invincibles’ a din kha an sawi lang tel zel ang.

Wenger chuan, "Sir Alex nena Hall of Fame luh rual hi ka tan chuan a hlu. Ka sawi thiam dan chuan boxer pahnih nasa taka inel, atthlak leh danglam tak taka inbei ṭhin, a tawpa hlim taka hah zu in dun leh thei angah ka ngai," tiin a sawi.

Arsenal manager hlui hian 2018 khan North London club hi a chhuahsan a, club dang a enkawl zui tawh lo. Tunah hian FIFA chuan Chief of Global Football Development atan a hmang mek, football tih hmasawn lama hotupa a ni.