AFC U17 Asian Cup-ah India leh Japan intawng dawn

Asia khawmualpuia kum 17 hnuai lam inelna ngaihhlut hlawh ber AFC Under-17 Asian Cup 2023-a group awm dan tur chu nimin khan pawh a ni a, India chu group D-ah Japan, Vietnam leh Uzbekistan te nen an awm ho dawn - Blue Tigers tan hna a awlsam dawn lo.

India U17 coach Bibiano Fernandes chuan, "Kan group awmna avang hian kan phur takzet. Team ṭha tak tak kan hmachhawn dawn a, ka naute pawhin khelh an châk tawh a ni.

"Eng level-ah pawh ni se, footballer-te hian a ṭha ber zel hmachhawn an châk a, Japan hi Asia-a team ṭha ber pawl an ni," a ti a, huphurh lam an ngaihtuah loh thu a sawi.

India hi nikum khan AFC Asian Cup 2023 khel tur hian an inpettling a, qualifier match li an khelhah vawi thum chakin, vawi khat chiah an tlawm - Maldives (5-0), Kuwait (3-0) leh Myanmar (4-1) te an sawp vek a, an ngam loh awmchhun hi Saudi Arabia (1-2) a ni.

Blue Tigers hi Saudi ngam loh vangin an group-ah pahnihna ni mah se, pahnihna ti ṭha zual paruk zingah telin Asian Cup khel tur hian an tling a ni - tunah chuan Asia-a a thiam pali zinga tel an tum.

Coach Baniano chuan, "Keini ho hma hreta India U17 te khan Uzbekistan leh Vietnam hi chu an lo hmachhawn tawh ṭhin a, result pawh an nei chhe lo. Hei vang hian kan tum ram thlen kan beisei a, chu chu Indian team zinga World Cup (FIFA U17) qualify hmasa ber nih a ni," a ti.

India hian kum 2017 khan FIFA U17 World Cup chu an lo khel tawh a, mahse, inelna thlengtu an nih vang chauha khel an ni a, qualifying paltlanga khelh an la nei lo.

June 15 - July 2, 2023 inkara neih tur AFC U17 Asian Cup-ah hian semifinal lut chin chu November, 2023 aṭanga khelh ṭan tur FIFA U17 World Cup khel turin an tling nghal dawn a ni.

Thailand-in a thlen tur inelnaah hian team 16 an tel dawn a, group paliah, team pali zela ṭhen hran niin, group tina a sang pahnih chuan quarterfinal an lut dawn - India hian quarterfinal luhna chance neiah an inngai.

AFC U17 Asian Cup-ah hian India hian 2002 leh 2018 khan a thlen san ṭum ber tawngin, quarterfinal an lut ve ve a, group D-a an awmpui tur zingah Japan chu vawi thum champion tawh niin, Uzbekistan hi vawi khat an champion tawh a, Vietnam-in semifinal an thleng tawh bawk - India hi la thleng hniam ber an ni hial.

India team-ah hian Vanlalpeka Guite chuan captain armband a hreng ṭhin a, winger Lalpekhlua chuan hmun pawimawh a chang bawk. Mizoram player pahnih hi AFC U17 Asian Cup-ah hian inlan leh ngei tura ngaih an ni.