Paul hnehin number 1 Alcaraz a tlang

Carlos Alcaraz chuan Miami Open nomawi a kawl lai humhim ngei a tum ruh hle, ruah surin an inkhel tibuai deuh mah se Spanish rawlthar hian Tommy Paul chu 6-3, 6-3 a hnehin quarterfinal a inhlangkai a ni.

Inkhel dangah, seeded pahnihna Stefanos Tsitsipas erawh Russian player Karen Khachanov hneh loin last 16-ah a zinkawng a tawp thung, hliam nei chunga khel lui Tsitsipas hi 7-6 (7/4), 6-4 in a chak lo.

Kum 19 mi Alcaraz hian tun hnaiah a zawnin match kua hnehna a chang leh ta a, vawiin zing hian seeded pakuana Taylor Fritz nen an inhmachhawn zui leh ang - American player hian Holger Rune 6-3, 6-4 in a lo hneh ve thung.

March thla tir khan Indian Wells-ah Alcaraz hi a lo champion tawh, tunah hian a champion leh a nih chuan a zawnin Grand Slam dawta inelna ngaihhlut Masters title a la thei dawn.

Miami Open hi atan a pawimawh hle, champion lai a nih avangin a ranking point neih sa humhum a ngai, a champion lo a nih chuan point hmuhsa a hloh dawn a, ranking chhuak tharah Novak Djokovic-a'n a rawn tlan pel thei dawn a ni.

Alcaraz chuan "Ka che fuh a fuh viauin ka hria, mahni inveng tak chunga khel chi ka ni a, hun remchang ka hmuh erawh chuan na takin ka nawr ve ṭhin, ka duh dan takin ka khel thei," tiin a khelh danah a lungawi hle.

Inkhel dangah Jannick Sinner chuan Botic van de Zandschulp 4-6, 6-4, 7-5 in a hneh. Italian tlangval hian tun tournament khelh laiah hian set a la hloh miah lo, a match lehpekah chuan Emil Ruusuvuori a hmachhawn leh dawn a ni.