Silly Point: Tata Indian Premier League ṭum 16-na chibai

Cricket tui mitena kum khat chhunga kan nghahfak khawmpui lian Indian Premier League 2023 chu a lo inher chhuak leh ta.

Harsatna a awm a nih lem loh chuan kumtin he India ram nipui thli lo thawk ṭan hun Vau Thlaah a bul ṭan ṭhin a ni a, cricket hun pui chu kumin atan pawh kan nghak chhuak leh ta.

Thla hnih chhung zet chu India pawisaa cheng vaibelche sing li sang nga (Rs 45,000 Crore) vel lenna tur IPL hi am takin i chawm ila, i hawp tel bawk ang u hmiang.

Hun thar, dan thar

Impact player (substitution pakhat siam theih) leh ṭhumvawr hunlaia kaptan ten team starting 11 tur thehluh kher a ngai lo.

Ṭhumvawr dan a zira an team tana ṭha ber tura inrem theih te leh wide leh no ball DRS hmanga ennawn theih a ni tawh tur te hi kumina thil thar tur te a ni.

Cricket game entertainment version ber hi chu, hun inher dan a zira, her rem ve zel a nihna pawh hi a danglamna a ni awm e.

Tu nge dingchang ang?

Ṭomir thla tahrik ni 28 hi chu damrei nghah thil a la ni tehmeuh mai a, mahse team hlun Royal Challengers Bangalore, Kings 11 Punjab leh Delhi Capitals te tan kum chhinchhiah tlâk a rawn inher ve tawh dawn nge?

IPL tih leh nomawi nena mi tam zawk mitthla a inzawm tlat, Chennai Super Kings leh Mumbai Indians bawk hi dingchang leh dawn?

An vawi khat inlanna champion nomawi hawn nghal leh kumina humhim ngei tura inbuatsaih Gujarat Titans erawh theihnghilh lo i la.

Modi Stadium lamah aw

Zanin dar 7:00 a lo rik meuh chuan, keini India ram chhak kila awm cricket ngainatu Zofate pawhin India ram khawthlang tawp, Ahmedabad khuaa, mipui nuai chuang lenna Modi Stadium lamah kan mit kan len lo thei lo ang.

Hamara Desh ram zau tak, darkar hnih dawna ni tlak leh chhuah hun inthlauhna leh zia, hnam leh tawng hrang daihna hian min daidang ṭhin mah se, India ti pumkhat tu game ropui cricket hmang hian, khawvel mipui nghahhlel Indian Premier League hmangin hruai khatin vuan tlang leh ila, inkhawmpui chibai kan inbuk thar leh ni rawh se.