NBA playoff inchuh boruak a nung

Basketball inelna sang ber NBA regular season an khel zo hnai, match 82 an khelh tur zinga 76 an khel tling tawh hlawm - khelh hmabak hi paruk lai la ni mah se, chawlhkar hnih pawh tling lo chhungin an khel zo vek tawh dawn.

April 9, Pathianniah NBA regular season hi a zo dawn. Eastern Conference aṭangin Milwaukee Bucks, Boston Celtics, Philadelphia 76ers leh Cleveland Cavaliers te chu playoff khel turin an tling tawh, an conference aṭangin hmun ruak pali a la awm.

Western Conference aṭangin Denver Nuggets, Memphis Grizzlies leh Sacramento Kings te an tling tawh, hmun ruak panga a la awm thung. Pariatna ni lai Los Angeles Lakers leh an hnuaia pahnih New Orleans Pelicans leh Oklahoma City Thunder te chak zat a inang.

Conference pahnih aṭang hian a sang zual paruk te chu playoff khel turin an tling nghal dawn, pasarihna aṭanga 10-na te chuan play-in hmangin playoff hmun ruak pahnih hi an inchuh leh ang - playoff hi team pariat tan a ni.

Nimin zing inkhelah Philadelphia 76ers chuan playoff la beisei vetu Dallas Mavericks lakah zahngaihna an lantir lo. Season hmasa Conference finalist Mavericks hian chawlhlawk laiin point 12 zetin hma hruai mah se, a tawpah 116-108 in an chak lo.

Inkhel dangah Phoenix Suns tan Kevin Durant a inlan thei leh tawh, hliam damkawr Durant inlanna inkhelah Suns hian Minnesota Timberwolves chu 107-100 in an hneh, minute 29 a inkhelh chhungin Durant-a'n point 16 a nei a, rebound vawi riat lain assist ṭum li a nei bawk.

Sacramento Kings chuan playoff atan an dinhmun ti chiang turin Portland Trail Blazers 120-80 in an hneh, kum 17 hnua a vawi khat nan a thiam zual pariat inelnaah an tel ve leh dawn a ni a, an tan chuan a hlu bik khawp ang.

Jrue Holiday-a point 51 hmangin Milwaukee Bucks chu Indiana Pacers lakah 149-136 in hnehna an chang. Eastern Conference hmahruaitu tan hian Giannis Antetokounmpo chuan tun season chhunga a vawi nga nan triple-double (38 point, 12 assist, 17 rebound) a nei.

Inkhel dangah Los Angeles Lakers chuan 121-110 in Chicago Bulls an hneh, an chak theih nan Anthony Davis chuan point 38 a nei a, an player pawimawh LeBron James pawhin point 25 a thawh ve bawk - season hmang ṭha lo mah se Lakers tan playoff khel turin kawng a la inhawng.