Number 2 Sabalenka hnehtu Sorana Cirstea

Miami Open khelh laiah Sorana Cirstea chuan world number 2 Aryna Sabalenka hnehin semifinal a inhlangkai. Kum 32 mi Cirstea hian Australian Open champion hi 6-4, 6-4 in a hneh.

Romanian nula Cirstea hi world number 74 daih a ni a, tun inelnaah hian seeded pawh a ni phak lo. Mahse, match nga chhung set hloh miah loin a chak tluang ta, tunah chuan a vawi khat nan ranking sang bik pathum chin player pawh a hneh thei ta hial.

Cirstea chuan, "Sawi ngaihna pawh ka hre lo, ka beisei phak bak a ni," tiin Sabalenka a hneh chungchang a sawi, a match lehpekah chuan Petra Kvitova leh Ekaterina Alexandrova inkhela chak zawk a hmachhawn leh ang.

Inkhel dangah Elena Rybakina chuan Martina Trevisan lakah 6-3, 6-0 a hnehna changin semifinal a lut - Wimbledon champion hi tun hnaiah a zawnin match 12 a chak ta, tukin hian seeded pathumna Jessica Pegula nen an intum lehnghal dawn a ni.