Hmabak 10 hi chu nuamti takin khel rawh u - Arteta

Arsenal manager Mikel Arteta chuan Premier League khelh hmabak match 10 an la neih a thlir a, tun season atana hmabak an la neihah a naute chu tihtakzetna nen nuamti taka match khel turin a chah.

Premier League hmahruaitu Gunners hi Manchester City aiin point riatin an sang mek, vawiin tlaiah Citizens hian Liverpool tlawh turin Anfield an pan dawn, an inkhel result hre sain zan dar 7:30-ah Arteta nauten Leeds United an mikhual ang.

Arteta chuan, "Midang inkhel result kan siamsak thei lo a, an inkhelah eng nge thleng pawh kan sawi thei lo. Kan inkhel erawh kan thua awm a ni a, kan result leh thil thleng chu kan thunun leh tih danglam theih a ni thung tih kan hria.

"Kan tih theih chu khelh hmabak kan la neihte nuamti taka khelh a ni tawh mai, chak duhna thinlung kan neih reng a ngai a, tihtakzetna leh phurna nen hmalam kan pan ang," tiin a sawi a, a naute chu boruak nuam leh engthawl tak hnuaia khel turin a duh.

International break an neih hma khan Arteta hian an hmabak chu an tan 'final' vek a nih thu a sawi a, a naute chu ram tana an feh chhuah hnuah pawh hlawhtlinna chan chak tak chungin North London club lamah kir leh se a duh thu a sawi a nih kha.

France tana kohna dawng William Saliba chu hliam vangin a inhnukdawk a, zaninah chuan a inlan theih a beisei awm. Ghana international midfielder Thomas Partey pawhin hliam tenau tuar mah se a dinhmun a chhe hran lo bawk.

Arteta chuan, "A ṭhen ram tan an feh chhuak a, a ṭhenin chawlh an hmang bawk. Boruak hran hran hipin an kal darh a, an lo kir lehna ni hmasa bera an training chuan min ti lawm, hnehna chan chakin an la tuihal reng a ni," tiin a sawi.

Norway tana a feh chhuahna lamah Martin Odegaard-a'n hliam tenau a tuar a, mahse Arsenal captain hian Ningani khan training a zawm pangngai. Gabriel Jesus, Gabriel Martinelli leh Bukayo Saka te nen an inkawp thei leh nghal dawn.

Saka-a'n Arsenal tana a khelh ṭhat ang bawkin England tan pawh a khel ṭha a, ani hi zaninah pawh Leeds United tlarhnung tan ven ngun a ngai khawp ang. Season tir lam an intawn ṭum pawhin Saka hian goal awmchhun a lo khung tawh a ni.

Arsenal hian April thla chhungin Liverpool, Manchester City leh Chelsea te an hmachhawn vek dawn, point hloh theihna match hautak an nih hlawm avangin zanin hi an tan chuan point thum lo hmuh lawk theihna remchang a ni ang.