Mizoram State TT C'ship-ah Techmaze an champion

Mizoram State Table Tennis Championship vawi 37-na chu nimin khan Table Tennis Hall, Mission Vengah khelh zawh a ni a, mipa final hmuhnawm takah Jeho Himnakulhpuingheta chuan Alberto LR Ruata hnehin a champion.

Jeho hi tun dinhmuna Mizo mipa inkhelh thiam ber a ni a, April 11-14, 2023 chhunga neih tur LBS Suzuki 4th Inter Branch YMA Table Tennis Tournament 2023-ah pawh champion tura rinkai a ni ang.

Jeho-a telna Techmaze Table Tennis Club, Mission Veng chuan gold medal paruk, silver medal pahnih leh bronze medal pathum lain overall champion an ni.

Inelna hi March 29, Nilaini aṭang khan khelh a ni a, inelnaah hian category 16 a awm. Table Tennis C'ship-ah hian Aizawl pawn district pali Lunglei, Kolasib, Serchhip leh Hnahthial te an tel.

Aizawl North leh South huam chhung aṭangin club 15 - Chanmari, Chhinga Veng, Daphalsa, Electric Veng, Mizoram Police, Mission Vengthlang, Model Veng, Ramhlun Vengthar, Ramhlun South, Synod School, Techmaze, Tuivamit, Vaivakawn, Zote leh PHE TTC te an tel bawk a ni.