Indian Navy-in Mizoram XI an hneh

Mizoram Football Association Golden Jubilee lawmna chi khat atan nimin khan Mizoram XI leh Indian Navy te an inhmachhawn a, Kolasib Sports Stadium, Kolasib-a inkhelah 2-1 in Indian Navy an chak.

Indian Navy Sports Control Board secretary captain Vijay Kumar chuan, "Kan ṭhat dan berin kan lokal a ni," tiin Vanglaini hnenah a lo sawi tawh a, Indian Navy hian Mizorama tlawm tur ringawta lo zin an ni lo tih tihlan an duh.

Kolasib Sports Stadium khat tlata mipui kalkhawm hmaah Indian Navy-in an tum ang ngeiin hnehna an chang a, first half chhungin Bibaka Thapa leh Pintu Mahata ten goal khat ve ve khungin, 2-0 in hma an hruai.

Second half-ah Mizoram XI aiawha khel, Kolasib club Project Veng FC tan R. Lalchawikima chuan goal khat a khung ve leh a, mahse, hun tawp thlenga goal dang a luh tawh loh avangin 2-1 in Indian Navy an chak.

Puitea telna

Mizoram tan ATK Mohun Bagan midfielder K. Lalṭhathanga (Puitea) chuan inkhel bul a ṭan a, Bethlehem Vengthlang tlangval che vel a hmuhnawmin, game siamtu ber a ni a, Indian Navy tan a hnawksak hle.

Mizoram aiawha khel Project Veng FC-in inkhel ṭantir lamah chance duhawm an insiam nual a, mahse, winger MS Dawngzela, striker Vanlalnghaka leh winger Andy Lalrinpuia ten an chance duhawm neih goal-ah an chantir thei lo.

Minute 30-naah PFC-in an chance neih chhawr theih loh an tuar a, goalkeeper RS Lalnghakliana a chesual. Bilkhawthlir keeper hian ball kal dan chhut sualin a chhuak hma hret a, Bibaka Thapa chuan pet khumin, goal-ah a chantir.

Navy lamin an duhtawk mai lo - first half tawp nan minute thum chauh a awm tawh tihah RS-a a chesual nawn a, Pintu Mahata zawnah tak ball hnek thlain, Mahata hian harsatna nei loin goal-ah a chantir nghal.

Beiseina thamral

Second half-ah PFC-in si phurh sut ngei tumin an nawr a, minute 67-naah winger R. Lalchawikima hmangin an thawhrim rah an seng - si phurh an sut ṭhen.

PFC hian Mizo football legend S. Malsawmtluanga chu second half-ah luhtir mah se, Mama tan danglamna thlen turin hun a tam tawk tawh lo a, Kolasib aṭanga Mizoram Premier League khel hmasa ber tur PFC-in 2-1 in Indian Navy an ngam lo.

Project Veng FC assistant manager Samuel Lalpekhlua chuan, "Hnehna chang zo lo mah ila, Mizoram aiawha khel tura thlan kan ni hi kan lawm a, he hun ṭha min siamsaktu Mizoram Football Association leh Kolasib District Football Association chungah lawmthu kan sawi a ni," tiin Vanglaini a hrilh.

PFC manager Joseph Zoremsanga chuan, "Skills-ah chuan inthlau bik kan awm lo. Chutihrual chuan an pumrua a lianin, tharum an ngah a, tun hnaiah kan chawlh avangin kan fitness a inthlau deuh bawk," tiin Vanglaini hnenah an chak loh chhan a sawi.