Mizo wushu fighter-ten bronze la

India rama wushu inelna sang National Senior Wushu Championships (Federation Cup)-ah Mizo wushu fighter pahnihin bronze medal an la a, Zemabawk tlangval Nazareth Lalṭhazuala chuan 56kg huangah lain, Republic veng nula Lalramchhani chuan 45kg huangah a la bawk.

Jalandhar, Punjab-a neina inelnaah hian Mizoram wushu team chuan player pali tirin, mipa pahnih leh hmeichhia pahnih an feh chhuak a, Mizoram Wushu Association finance secretary PH Shanjit Meitei kaihhruainain inelna hi an hmachhawn a ni.

Mizoram Wushu Association chuan thuchhuah siamin, national inelnaa Mizoram aiawha feh chhuak official leh player te chungah lawmthu an sawi a, "Player zawng zawng te kan chhuang em em a, medal min petu Pathian hnenah lawmthu kan sawi a ni," an ti bawk.