Marquez hi ka elpui ber a ni lo - Bagnaia

MotoGP champion lai Francesco Bagnaia chuan Marc Marquez leh Enea Bastianini te chu nomawi a inchuh pui ber an ni lo tih a sawi, rider ṭha ve tawk tak nia inngai tan chuan a thusawi hi pai dam a harsa mai thei.

Tun season intlansiak hmasa berah Marquez a chesual. Repsol Honda rider hian Miguel Oliveira a su a, intlansiak an hmachhawn chhunzawm theih loh bakah Marquez hi intlansiak lehpek atan hremna pek a ni bawk.

Inelna an neih zawh hlimah Marquez hian ngaihdam a dil nghal a, mahse awmzia a nei tawh lo. Honda chuan International Motorcycling Federation (FIM) lakah hremna hlip turin an ngen a, mahse nimin tlai thleng kha chuan chhanna an la dawng lo.

Marquez ang bawkin Enea Bastianini hi a chesual, inelna pangngai tak neih hma 'Sprint Race' an neih lain a chesual a, a dar (koki) hliam chu zai ngai dawn lo mah se intlansiak pakhat chu a hmachhawn theih a rinawm loh.

Ducati rider Bagnaia chuan, "Marc leh Bastianini te hi dam leh thuai turin ka duh a, duhsakna pawh ka hlan. Tuna an chetsual vang pawh ni loin, team lam nena kan elpui hautak tur kan sawi zingah anni pahnih hi an tel lo.

"Maverick Vinales leh Marco Bezzecchi ten min hnaih em em a, anni panhnih hi tun kar tawpah pawh kan tana elpui haitak an nih a rinawm," tiin a sawi a, rider champion nomawi a kawl chu humhim a tum tih a sawi bawk.

Pathianni zan dar 10:30 hian Autódromo Termas de Río Hondo tlankawngah Argentina Grand Prix an tlan dawn, bike intlansiak ngainatute tan chuan inkhawm tibuai loa intlansiak en theih hi thil lawmawm a ni ang.