Alcaraz leh Rybakina tan nomawi a hnai zel

Mipa tennis number 1 Carlos Alcaraz chuan Mimai Open semifinal a lut a, hmeichhe singles lamah Elena Rybakina pawhin quarterfinal a paltang ve bawk - player pahnih hi 'Sunshine Double' thei dinhmunah an ding mek.

Tournament khelh zawh hlim Indian Wells-ah Alcaraz leh Rybakina te hi an champion. Grand Slam dawta inelna ngaihhlut Masters title an lak hnuah Miami Open an khel zui a, a zawna an champion chuan 'Sunshine Double' an ni thei dawn - match hnih ve ve an la hmabak a ni.

Mipa inelna lamah number 1 Alcaraz hian seeded pakuana Taylor Fritz chu 6-4, 6-2 in a hneh, semifinal-ah chuan Jannick Sinner a hmachhawn leh ang - Italian player nen hian season hmasa US Open quarterfinal kha darkar nga chhung an lo khel tawh.

Tukina mipa semifinal hi a hmuhnawm dawn, player pahnih hi an intawn vawi rukna a ni ang. Spanish player Alcaraz hian record nei ṭha zawkin 3-2 in hma a hruai, an inthlau lem lo hle a ni.

Miami Open champion lai Alcaraz chuan, "A ṭha thei anga bera ka khelh a ngai dawn," tiin a sawi a, a khingpui tur Sinner chuan Alcaraz hmachhawn chu atan hmasawnna a nih leh tur thu a sawi ve bawk.

Mipa quarterfinal inkhel dangah Daniil Medvedev pawhin a khelh ṭhat a la chhawmnung zel. Russian player hian Christopher Eubanks chu 6-3, 7-5 in a hneh a, a hnam pui Karen Khachanov nen an intum ve leh thung dawn a ni.

Hmeichhe singles lamah Wimbledon champion Rybakina chuan world number 3 Jessica Pegula 7-6 (7-3), 6-4 in a hneh. Aryna Sabalenka hneha Indian Wells title la thei Rybakina hi tun hnaiah match 13 chhung a chak zawn ta.

Inkhel dangah Petra Kvitova chuan Ekaterina Alexandrova 6-4, 3-6, 6-3 in a hneh a, a vawi khat nan Miami Open semifinal a inhlangkai ve bawk, tun ṭumah hian mipa leh hmeichha player rinkai te an che ṭha rih hle.