Napoli mualah AC Milan

Chawlhkar thum chhungin AC Milan leh Napoli te vawi thum an inkhel dawn, an match hmasa ber atan Pathianni zan dar 12:15 hian Naples khawpuiah Serie A match an khel ang.

Italian club ṭha pahnih te hi April thla chhungin Champions League quarterfinal-ah vawi hnih an inkhel leh hman dawn bawk, team ṭha pahnih zingah tunge ruh no zawk leh team khauh zawk hriat theihna hun a ni dawn.

Serie A hmahruaitu Napoli hian Milan lak aṭangin league nomawi an chhuhsak dawn tia sawi ngam a ni tawh, an chesual hle a nih ngawt loh chuan Luciano Spalletti naute an champion dawn, a theih chuan a rang lama an dinhmun tihfel an duh ang.

Stefano Pioli enkawl Milan tan beiseina chhete tal a la awm chhung chuan tlawm nghal ngawt chi a ni bik lo. Chutihrualin, Pioli hian Spalletti enkawl team vawi 13 a hmachhawn tahwah vawi khat chiah chak ni hmel a la hmu, a hmabak a hautak dawn takzet.

AC Milan manager Pioli chuan, "Napoli hi team ṭha tak an nih zia chu Serie A hmahruaitu an nihna hian a ti nghet, tun season atana league an khelh dan hi chu engti zawng mahin a dah hniam theih loh, an ṭha tih chu kan pawm dan pawh a ni.

"Mahse, Serie A chauh ni loin Champions League kan khel tel dawn, European football nen a inkawp tawh hi chuan a boruak a danglam ṭhin. Keini pawhin kan zahawmna humhim turin kan khel dawn a ni," tiin khualmualah chak ngei an tum.

Napoli hian tun season Serie A match 27 an khelh zinga 23 tehmeuhah hnehna an chang thei a, goal 64 khungin anmahni hnaih bertu Milan hian goal 44 an khung thung, an inthlauhna hi goal 20 a tling hial a ni.

Zanin dar 9:30 hian Champions League quarterfinal khel tur dang Inter Milan chuan Fiorentina an mikhual dawn a, league match dangah season thar European football la beisei vetu Juventus leh Verona an inkhel bawk ang.