Der Klassiker Champion tum inum leh point ruk inchuhna

Borussia Dortmund-in Bundesliga champion lai Bayern Munich aiin point khatin an hmu tam a, zanin dar 10:00 hian Allianz Arena-ah an inkhel dawn. Bavarians hian international break laiin coach Julian Nagelsmann banin Thomas Tuchel an lalut a, hei hian inkhel chhehvel a tingaihnawm sawt.

Bayern leh Dortmund inkhel hi 'Der Klassiker' an vuah a, point ruk inchuhna tia sawi theih a nih avangin champion inumna kawngah zanin inkhel tur hi a pawimawh takzet a ni.

Bench-ah Musiala?

German rawlthar zinga ṭha ber ang hiala chhal ngam Jamal Musiala chu coach thar Thomas Tuchel hnuaia bul ṭan nghal turah dah a ni lo. Musiala hi malpui hliam vanga a damchian loh vang a tih theih a, dam chiang ta reng pawh ni se Tuchel hian Leroy Sane a thlang zawk thei bawk.

Tuchel hian tun hmain player theihna nei sang Pierre-Emerick Aubameyang, Ousmane Dembélé, Kylian Mbappé leh Neymar te thiam takin a lo chhawr tawh a, Musiala leh Sane pawh a hman thiam ngei a rinawm.

Coach chhuak ta Nagelsmann khan season khat leh a chanve hnuah formation leh starting XI nghet a nei ṭan chauhah a ngaih theih a, Tuchel hian engtia rei nge hun a duh dawn tih hriat a la ni lo.

A lai lumah Muller

Bayern-a coach hlawhtling ni tur chuan Thomas Muller bul ṭantir a ngai an ti ṭhin a, Tuchel pawhin a zawm ngei a rinawm. Kum 33 mi Muller hi Manuel Neuer inhliam avangin captain armband hreng tura ngaih a ni bawk.

Muller-a'n hmun pawimawh a chan dawn chuan mual sira Musiala tawlh a ngai dawn tihna a ni a, mual sirah Sane bakah Kingsley Coman, Sadio Mane leh Serge Gnabry te an la awm cheu. Bayern-in tlarhma lamah player an nei ṭha hle.

Chutihrualin Robert Lewandowski a awm tawh loh avangin no. 9 player langsar bik an nei tawh lo a, tun season bikah erawh Eric Maxim Choupo-Moting-a'n Lewy hmun ruak a hnawh khat ṭha viau thung.

Dortmund ve thung

Borussia Dortmund-in nikum August thla hnuah a vawi khat nan a chung berah hun an hmang a, pakhatna ni chhunzawm turin German club ṭha ber Bayern lakah point hmuh a ṭul.

Edin Terzic hote hi Champions League aṭanga an tlak tawh avangin an rilru kap theitu chu league baka DFB-Pokal quarterfinal chauh a ni tawh a, Der Klassiker aṭanga ni linaah RB Leipzig an hmachhawn dawn.

Bundesliga-ah Dortmund hian kuminah hneh loh an la neih loh avangin an inringtawk dawn a, international break hmain FC Cologne chu 6-1 zetin an sawp bawk.

Terzic-a hote hian Erling Haaland awm loh hnuah goal khungtu bik tia sawi theih an nei lo a, kil tin aṭangin goal an khung. Inelna hrang hrangah player pasarihin goal nga emaw a aia tam an khung tawh a, goal 10 aia tam khung an awm lo thung.

English midfielder Jude Bellingham tan tun hi hming chherna hun ṭha a ni a, captain Marco Reus tan a pawimawh zual. Reus hi club lianin sawm ṭhin mah se Dormtund a chhuahsan duh lo a, a club hmangaih hi Bundesliga-a champion pui tur chuan zanina Bayern an hneh hi a ṭul a ni.