Mbappe hma hun an inrinsiak mek

Nipui hmasa mai khan Kylian Mbappe chuan Real Madrid sawmna hnarin Paris Saint Germain tan contract a pawtsei thut a - Spanish club nena an boruak kha a la rei lo viau, tunah chuan France captain hi a hma hun an inrinsiak leh mek tawh.

Mbappe contract neih lai hi season thar lo awm tur thleng daih hi a ni, kum hnih daih chauh inremna an ziah avangin tun nipui bazar leh nakkum thlasik bazar hi man neia a chhuah theih hun chu a ni leh der tawh.

Kum 24 mi chauh ni chunga France captain ni thei hian a hma hun thui tak a sawi duh ngai lo, chiang taka a sawi erawh tun dinhmunah chuan Paris khawpuiah a hlim a, a club PSG tan theihtawp a chhuah tih a ni thung.

Mbappe-a laina hnai tak pakhat chuan, tuna a contract neih lai hi a zawh hunah man nei loa Real Madrid zawm a tum, tiin a lo sawi ve thung. Tun dinhmunah chuan Spanish club hian hun tepter tawh taka anmahni hnawltu hi an la dawr leh rih lo.

Ligue 1 champion PSG hian international break hnua an match hmasa atan Pathianni zan dar 12:15 hian Lyon an mikhual ang.