Champion turin kawng dik kan zawh - Barca President

La Liga hmahruaitu Barcelona president Joan Laporta chuan champion tura kawng dik an zawh mek thu a sawi a, "La Liga nomawi chawi turin kawng dik kan zawh mek a, mahse, nomawi inchuhna hi a la zo lo," tiin a sawi.

Barcelona hian La Liga-a match 26 khelh tawhah point 68 neiin hma an hruai mek a, league match hnihah chiah la tlawmin, match hnih draw an nei a, a bak match 22-ah hnehna an chang - an match hnuhnung berah El Clasico khelin, Real Madrid chu 2-1 in an hneh.

Champion lai Real hi Barca hnaihtu ber niin, El Clasico-a an tlawm avangin Catalan club nena an inkarah point 12 ngawt a awm tawh a, Laporta-a'n champion tura kawng dik an zawh mek thu a sawi hi a awm lo hran lo.

Laporta chuan, "Nomawi chawi turin kawng dik kan zawh mek a, chu chu player-te pawhin an hria a ni. Tlarhnung kan veng ṭhain, kan goal nawr a na em em bawk. Chutihrual chuan season tawp nan thla thum lai a la awm a, champion lawm nan a la hma lutuk. Theihtawp kan chhuah chhunzawm zel a ṭul a, nomawi inchuhna hi a la tawp lo a ni," a ti.

Barca hian zanin dar 12:30-ah Elche an lenchilh dawn a, Pathianni zan dar 7:45-ah an elpui Real Madrid chuan Real Valladolid mikhualin, Pathianni zan dar 12:30-ah Atletico Madrid chuan Real Betis an mikhual ang.