F1 champion nih theih beisei Perez

Sergio Perez chuan Formula 1 champion nih theih a inbeisei a, a team Red Bull chuan Max Verstappen ang bawkin champion nih theihna kawng an siamsak tih a sawi bawk.

Tun season F1 intlansiak hmasa berah Verstappen a chak a, a hnungah a teammate Perez a thleng. Intlansaik vawi hnihnaah Perez a chak ve thung a, a hnunga thleng chu Verstappen a ni thung.

Red Bull driver pahnih ten car intlansiakna sang an thunun mek. Pathianni chawhma dar 10:30 hian intlansiak pathumna atan Australian Grand Prix an tlan dawn, team dang tan Red Bull hi el fe tham an ni dawn.

Perez chuan, "Kum 2021 khan Red Bull hi ka zawm a, thil a danglam ka ti hle. Team dang ang lo takin anni chuan driver pahnih tan champion nih theihna kawng an siamsak. Chuvangin Max an thlawp ang thoin kei pawh min thlawp.

"Chuvangin kei ka ni emaw, ka ṭhianpa Max emaw pawh ni se champion thei kan niah ka ngai," a ti. Formula 1 team ten driver number 1 an nei ṭhin, chutiang bawkin Red Bull tan pawh Verstappen hi number 1 a ni - Perez pawh hian chu chu a hai bik loin a rinawm.

Mahse, Perez sawi ang hian Red Bull hian an driver pahnih an duhsak ve ve a, team dangin an tih hleihtheih loh ang kha an ti thei niin a lang. Champion tum inel boruak sang zelah eng nge thleng dawn erawh a la hriat loh.

Lewis Hamilon awmna Mercedes erawhin beisei an la phak lo. Britain tlangval Hamilton chuan Red Bull dinhmun ang luah phak tur chuan nasa taka hmasawn an la ngaih thu a sawi a, a teammate George Russell pawhin Red Bull an phak lo tih a lo sawi ve tawh bawk.