Pathianni zanah League Cup final rematch

Newcastle United chuan Pathianni zan dar 9:00 hian League Cup final-a an hneh loh Manchester United an mikhual dawn. Club pahnih tan Premier League nomawi chawi a harsa tawh dawn a, chutihrualin season thara Champions League khelh an tum avangin an inkhel tur hi a la pawimawh hle.

Erik Ten Hag-a hote hi pathumnaah awm mek mah se pangana Newcastle aiin point thum chauhin an hmu tam zawk. Eddie Howe-a hote hian hnehna an chang a nih chuan khelh zat inangah Man United nen an point hmuh zat a inang dawn a, goal difference-ah an ṭhat zawk bawk avangin Magpies hi UCL khel thei zingah an tel ang.

Newcastle hian hliam vangin Miguel Almiron an chhawr thei dawn lo a, FA Cup final-a cup-tied vanga inlan thei lo Anthony Gordon bakah defender Sven Botman leh keeper Nick Pope te chu hliam vangin an dinhmun a chiang lo.

Mapgies tana chanchin lawmawm erawh Joelinton-a'n hremna a hmang zo a, a rawn inlan thei tawh dawn. Howe-a hote hian international break laiin Dubai-ah training an nei a, English manager chuan, "Hun ṭha tak kan hmang," tiin a sawi. Callum Wilson leh Allan Saint-Maximin ten training ṭha tak an nei a, Man United lakah hmun pawimawh an chang ang.

Man United hrem vangin Casemiro an chhawr thei dawn lo a, rawlthar duhawm Alejandro Gnarnacho a inhliam bawk. Ten Hag-a harsatna belhchhah turin Raphael Varane leh Marcus Rashford te dinhmun a chiang lo. April thla chhungin Man United-in FA Cup leh Europa League khelh tur an nei a, match khelh tur an ngah avangin Dutch manager tan player hman thiam a ṭul dawn a ni.