Champions League khel lo tur Liverpool?

Liverpool-in tun season-ah nomawi an chawi dawn lo tih chu international break hma khan a chiang tawh a, an beiseina neih chhun chu season thara Champions League khelh chu a ni - mahse, he beiseina pawh hi a thamral ṭan mek a, Liverpool fans hringnun a chawhnu deuh ruih reng mai!

Inrinni zan khan Etihad Stadium-ah Liverpool an lenglut a, champion tum Manchester City chuan 4-1 in an lo hneh - goal lut zat belhkhawm chu 5 (panga) a ni a, season tawpah Premier League table-a Liverpool dinhmun tur a ni lo ang, tih a sawi theih loh.

Liverpool tan City an hmachhawn hnuhnung match thuma goal khung vektu Mohamed Salah chuan goal hmahruai a khung a, mahse, City hian hliam vanga Erling Haaland an chhawr thei lo chungin Liverpool lehthal turin harsatna an tawk lo.

City tan Julian Alvarez, Kevin de Bruyne, Ilkay Gundogan leh Jack Grealish te chuan goal khat ṭheuh an khung a, hun tawp thlenga goal dang lut tawh loin City an chak - hmahruaitu Arsenal an um zel e.

Chhaih kawlhtu

Jurgen Klopp-a'n City zawhah Chelsea leh Arsenal an hmachhawn zui dawn tih a hria a, an tan tun hi an hma hun hriltu thui tak a nih tur thu a sawi - Etihad Stadium-ah Liverpool-in chak an tum.

Minute 17-na lekah fan-te lawmna thlen turin Salah a inlar zui a, Egyptian forward hian Diogo Jota-a'n ṭha taka a siamrem sak chu player ṭha bik a ni tih pholangin goal-ah a chantir a, Etihad Stadium a reh.

Mahse, Liverpool fan-te beiseina siamsaktu goal hi City chhaih kawlhna goal lek a chang zo a, mualneitu team hian an si phurh sut turin an nghak rei lo.

Riyad Mahrez-a'n chance duhawm a hlah hnuah Alvarez a inlar a, Argentine forward hian rintlak a ni tih pholangin, minute 27-naa Grealish-a siamsak chu goal-ah a chantir a, 1-1 a ni.

A sur ta

Alvarez-a'n goal a khung a, Liverpool tan chuan ruah thimpui tla tura ruah hmahruai ang chauh a ni a, do han rual a ni lo. First half-ah goal dang lut lo mah se, chawlhlawk hman zawh aṭanga second 53-na lekah KDB kan hmu a, Mahrez-a siamsak chu hnai set sawt aṭangin an hmahruaina goal ni turin a khung.

City an phur laklawh a, tawpsan mai an tum lo - Alvarez-a shot, Trent Alexander-Arnold-a dan per chu Gundogan chuan minute 53-naah an goal thumna ni turin a khung a, goal hmahruai khungtu Reds chu 3-1 in an hnufual.

Reds manager Jurgen Klopp-a'n goal thum an chhuah hnuah Darwin Nunez leh Roberto Firmino luhtirin, si phurh sut inbeisei mah se a thlawn mai a chang a, goal an chhuah nawn ta zawk.

Minute 74-na a ni a, khel ṭha em em mai Jack Grealish-a hun a inher chhuak. Belgian midfielder ṭha mi KDB-a siamsak chu English forward hian tlu chungin a tlawh hram a, Alisson-a'n a dang hman lo - Grealish hian 1-0 a an hnufual lai khan Salah-a khung belh ngei tur nia lang chu a dansak bawk.

A har a ni

Liverpool-in goal li an chhuah a, Chelsea (April 4) leh Arsenal (April 9) an hmachhawn zui dawn avangin an hmabak a awlsam ta lo hle - Reds hian 7-0 a Manchester United an sawp hnuah khan Bournemouth (1-0), Real Madrid (1-0) leh City (4-1) an ngam lo ta.

Mi tam takin khawvela defender ṭha ber ang hiala an ngaih hman Virgil van Dijk hian ngai a la awh miah lo tih a lang chiang a, TAA chetsual ngunzia sawi nawn a ngai lo - Grealish khelh ṭhat thuah phat tur a awm lo a, mahse, English forward khelh ṭhat chhan langsar chu Arnold a ni.

City lakah Andy Robertson pawh a khel ṭha tawk lo a, midfield-a Jordan Henderson leh Fabinho inkawp hi hmuh an hahthlak a, player pahnih, chawlh hnaih tawh, thathona reng nei lo ang maiin an khel.

Pep-a City erawh an squad chhahzia a lang nawn a, defender John Stones-a'n midfield-a ball sem chunga tlarhnung a pui ṭhinte chu a hmuhnawm a, Haaland tel lo hian 'team game' an khel zawk em aw, tih mai tur a ni.