Champion rimnam Arsenal tan goal 2 nen Jesus a inlar
Premier League hmahruaitu Arsenal chuan Gabriel Jesus-a goal hnih hmangin Leeds United 4-1 in an sawp a, league hmahruaitu an nihna chu point riatah an sawhnghet leh phawt - khelh hmabak pakua an la nei.
Gunners tan Jesus bakah Ben White leh Granit Xhaka ten goal khat ve ve an khung bawk, mikhual Leeds tana Rasmus Kristensen goal khungin awmzia a nei phak lo. Mikel Arteta nauten an phu ang ngeiin point thum an hlawh chhuak.
Arteta inringtawk
Tun season chhung atan Arsenal hian Premier League bak khelh tur an nei tawh lo. Leeds nen an inkhelh hmain Arteta chuan a naute chu nuamti taka inkhel tawp turin a ti a, midang inkhel result chu an thunun phak a nih loh thu a sawi tel bawk.
Inrinni zan tirah Manchester City chuan Liverpool 4-1 in an hneh, champion lai hian Arsenal nena an inkar point ngaah an sawr zim a, an match khelh zat a intluk chiah bawk - Citizens hian champion an la tum tih a takin an lantir.
Arteta chuan, "Manchester City inkhelh lai kha chuan Bus-ah kan chuang a, kan ngaihsak hman teh vak lo. Emirates Stadium kan thlen hnuah chuan midang kan ngaihtuah tawh lo, kan inkhelh tur chauh kan ngaihtuah," tiin a sawi.
Man City an chak tih hre sain Arsenal an inlan, manager Arteta-a'n a player chhawr rim ber Bukayo Saka chu bench lamah a dah! England tan match hnih khel hlim a ni a, kar tawpa Liverpool nen an inkhelh tur a ngaihtuah tel bawk - inringtawk takin a naute a rem.
Jesus a inlar
Gabriel Jesus pawimawhna hi goal khung chauh a ni lo a, team tana danglamna thlen ṭhin hi inkhel en ṭhin chuan an hmufiah ang. Brazil international striker hian chawlhlawk hma deuhin ama penalty hlawh chhuah a khung.
Second half ṭan chiahah Ben White chuan Gabriel Martinelli-a cross a pet lut pawp. Leeds inrin hmain Leandro Trossard-a'n defender a vir khum hnuah Jesus tan a siamsak a, minute 55-ah 3-0 niin a chak tur a chiang der tawh.
An dinhmun a ṭhat hnuah Arteta-a'n player a siksawi. Jesus leh Thomas Partey a la chhuak a, forward Saka leh midfielder Jorginho te a dah lut thung - an inthlak kual hnuah pawh inkhel chu an la thunun chhunzawm tho.
Rasmus Kristensen, Crysencio Summerville leh Jack Harrison ten Arsenal keeper Aaron Ramsdale tan hna an siamsak vek, goal thum an chhuah hnuah Kristensen hian tlarhnung phui lo karah goal khat a khung.
Leeds phur thar viau mah se, mual sirah Saka-a'n player pahnih kar aṭangin Martin Odegaard ball a pe - Arsenal captain hian box chhunga awm Xhaka tana tauh luh nuam tawk tur chiahin a vawrh lut a, chak nemnghehna goal an khung.
A lungawi
Hnehna an chan hnuah Mikel Arteta chuan, "Tun hnai maiah pawh khan ka sawi tawh, kan thunun theih chu keimahni inkhel result chauh hi a ni. International break avang khan player ṭhenkhat nen chauh training kan lo nei a, chumi hnuah inkhel leh kan nih avangin a awlsam lo.
"Chutih rualin ka naute khan ka beisei ang takin an khel thei, hnehna changtu nih kan duh vek a, team tana tha thawhtu nih an duh vek bawk, hetiang ang rilru kan phu thei hi ka lawm a, kan khelh danah tun hma aiin ka lawm," a ti.
Chak lo mah se Leeds United manager Javi Gracia chuan an ruahmanna hmasa a fuh tih a sawi. Gracia chuan, "League hmahruaitu lakah goal khung theihna remchang kan insiam nual, a tirah khan a laiah kan inveng nasa, hun rei tak pawh kan inveng ṭha hle.
"Mahse, vanduai thlak takin penalty kan chawi, kha penalty khan inkhel a ti danglam a, kan khelh dan phung pawh a buai phah," tiin a sawi. Leeds hi EPL table-ah 16-na an ni mek, tla thei china awm Leicester City nen an inthlauhna chu point khat chiah a ni.