Chelsea tan kawl a êng thei lo

Graham Potter hnuaiah Chelsea-in hlim lai an nei meuh lo a, vanduainain an chungah thla a zar. Inrinni zan Stamford Bridge inkhelah Blues-in chance ṭhahnem tak nei mah se goal an khung thei miau lo a, mikhual Aston Villa lakah 2-0 in an tlawm.

Unai Emery hoten Ollie Watkins leh John McGinn hmangin goal an khung. Minute 18-naa Watkins-a goal hi Chelsea defender Marc Cucurella tihsual vang a ni a, Villa forward-in 'cool' takin a khung.

Chelsea erawhin Villa tih ṭhat tawk loh an hmang ṭangkai thei lo a, Arsenal aia Chelsea thlangtu Mykhailo Mudryk-a'n keeper Emiliano Martinez chauh a hmachhawn hnuah ṭum hnih ngawt a khung lo.

Joao Felix goal hmaah a vannei lo a, N'Golo Kante-a'n hnai tak aṭangin a pet goal lo. Goal chance aṭangin chak zawk en a ni lo a, goal aṭanga chak tur zawk en ṭhin a nih miau avangin Villa-in point thum hlu tak an hlawh chhuak.

Chelsea-in an elpui Aston Villa an hneh loh avangin table-ah 10-naah an awm pha tawh lo a, club thuneituten Graham Potter an chhan tlat avangin Blues ṭantute tan beisei tur a tlem ta hle.

Blues hian Thawhlehni zanah Liverpool an mikhual dawn a, Jurgen Klopp-a hote hi Man City laka mualpho hlim an ni. London club hian result ṭha an neih theih loh chuan Todd Boehly pawhin Potter hi a chhan theih reng a rinawm lo a, Bayern Munich ban tak Julian Nagelsmann-a'n Stamford Bridge pan hi a hreh lo niin sawi a awm bawk.