Germany-ah Bayern el phak an awm lo

Der Klassiker hmangin Inrinni zan khan Bundesliga champion tur zawnna neih a ni a, champion lai Bayern Munich-in inkhelh hmaa league hmahruaitu Borussia Dortmund chu 4-2 a sawpin table chung berah an awm.

Thomas Tuchel hnuaiah Bayern chhiang takin an chak a, Dortmund aiin point hnih chauhin hmu tam mah se Allianz Arena-ah chiang taka an elpui an hneh avangin nomawi an hum ngei a rinawm.

Dortmund keeper Gregor Kobel a chesual a, ball vawrh luh satliah a pet pial avangin Bayern-in hma an hruai hma. Hemi hnu hian Thomas Muller-a'n goal hnih khungin Kingsley Coman-a'n a khung belh a, 4-0 a ni phawt. Mikhual team mualpho lutuk tur hliah khuh nan Emre Can leh Donyell Malen ten goal khat ve ve an khung bawk.

Tuchel-a hun a inṭan

International break laiin Cristiano Ronaldo-a'n ram tana khel tam ber record a siam a, Ronaldo boruak lian tak ai pawhin Bayern-in boruak an nei lian zawk. Bavarians hi treble champion thei an la ni chungin an manager Julian Nagelsmann an ban a, Thomas Tuchel an la lut.

Tuchel-a'n pressure nasa tak a nei nghal a, an chunga awm Borussia Dortmund hi hneh lo se Bayern hotute thutlukna mak tak hi sawi zui theih tur a ni. Amaherawhchu Chelsea manager hlui Tuchel-a'n hna ṭha tak a thawk a, Bayern player-te a hrechiang tih a lang bawk.

Chelsea manager hlui Tuchel-a'n Bayern manager hlawhtling Jupp Heynckes leh Hansi Flick te hlawhtlinna formation 4-2-3-1 a rawn hmang ve chat. Manager kal chhuak ta, Nagelsmann kha chuan Robert Lewandowski awm loh hnuah formation dang a enchhin nasa.

Tuchel hian match pawimawh a ni tih hriain tawnhriat nei player-te hmun pawimawh a chantir a, rinlawk ang ngeiin Jamal Musiala chu bench-ah a awm. Tlarhnung aṭanga goal nawr na Joao Cancelo aiah Bayern khelh dan hre bel pahnih Benjamin Pavard leh Alphonso Davies a ring zawk ve ve.

Mr Bayern - Muller

Footballer ropui thlanna Ballon d'Or a ni emaw Best FIFA Men's Player emaw pawh ni se vote hmu tam zingah Thomas Muller a tel ngai lo. Bayern-ah pawh Muller hi a langsar vut lo a, mah se amah hi Bayern ti Bayern-tu a ni.

Mr Bayern ti hiala hming lem an pek hial Muller hi Bayern tan a pawimawh ṭhin. Muller hmun pawimawh chantir lotu Niko Kovac leh Nagelsmann ten an hna an chan phah a, Heynckes leh Flick te an treble champion thung.

Tuchel hnuaiah Muller-a'n captain armband a hreng a, a positioning a dik ṭhin bakah team khelh dan a hrechiang tih a lang. Hei chauh hi a ni lo a, an khingpuiten an duhna taka an pass theih loh nan a ding dik ṭhin hle.

Bayern-in Dortmund keeper Kobel-a tihsual vang liau liauin goal hmahruai an khung a, goal hnihna leh thumna erawh vanneih vang a ni ngawt lo. Muller-a'n a awmna tur a hre tlat a, minute 18-naah Matthijs de Ligt ball tauh chu Muller-a'n a su lut.

Minute 23-naah Leroy Sane ball pet lak lawh zet chu keeper Kobe-a'n a dang ṭha tawk lo a, Muller bawkin a khung. Bayern-in Muller awm laiin 4-0 in hma an hruai tawh a, Muller awm loh hnuah game discipline chhe hretin goal hnih an chhuah.

En châkawm dang

Der Klassiker hi table-a team pahnih dinhmun avangin en a châkawm a, amaherawhchu a sa sehah Dortmund an zuzi avangin beisei a pha lo hle. Amaherawhchu hmuhnawm dang en tur a la awm dawn a, hei erawh Bundesliga-ah ni loin Champions League lamah a ni tawh thung ang.

Bayern hian April 11, Thawhlehni zanah Etihad Stadium-ah Manchester City an hmachhawn dawn a, Allianz Arena-ah April 19, Nilaini zanah an inkhel leh ang. City manager hi Pep Guardiola a ni a, Bayern manager thar Tuchel-a'n Chelsea a enkawl laiin UCL final-ah a hneh tawh.

Hei chauh hi a ni lo, Guardiola hian hlawhtling takin Bayern hi a enkawl tawh. Amaherawhchu Pep-a hnuaiah Bayern hian UCL semifinal ṭum thum an thleng a, Spanish club Real Madrid, Barcelona leh Atletico Madrid hneh loin an tla. Spanish manager hian City pawh hi hlawhtlinna ṭhahnem tak chanpui tawh mah se UCL a la champion pui lo a, a club hlui Bayern lakah a nomawi beiseina hi thamral thei a ni.

Bayern hian Dortmund an khelh dan thlirin City hmachhawn turin an inpeih a, amaherawhchu an tlarhnung buaina chinfel a ni lo. De Ligt khel ṭha viau mah se hun tawp lamah goal hnih an chhuah a, Nagelsmann-a awm lai ang thoin tlarhnung a la phui lo. Tuchel-a'n Bundesliga nomawi baka UCL nomawi a duh tel a nih chuan tlarhnung tihphui ran a ṭul ang.