MBA FINALS: Saitluangpuia & Abi an langsar

Mizoram Badminton Association (MBA) hnuaia season khat chhunga ranking sang pariatte inelna MBA Finals 2023 chu March 31 khan khelh zawh a ni ta. Champhai Town Hall-a neih inelnaah hian, inelna ngaihhlut hlawh mipa singles-ah Saitluangpuia a champion a, hmeichhe singles-ah Abigail Lalṭhazuali a champion thung.

MBA hian tun session chhungin tournament vawi sarih an siam a, heng tournament-a category hrang hranga champion hnem ber Ralte Villa Badminton Club hnenah MBA overall championship nomawi hlan an ni. Champhai District Badminton Association (CDBA) hnuaia awm Ralte Villa hi a zawna overall champion vawi thum an nihna a ni a, an nep lo hle.

Saitluangpuia a tluang

Men's singles final-ah Saitluangpuia leh Joseph VL Ringngheta te an inhmachhawn a, Ramhlun Venglai rawlthar Saitluangpuia'n 21-9, 22-20, straight set-in hnehna a chang. Kulikawn Veng tlangval, Ralte Villa BC player Joseph-a tan silver medal-a lungawi zir mai a ṭul.

Kum 17 mi Saitluangpuia hi MBA tournament lian ber, Mazuala Memorial MBA Official Championship-Senior 2022 a Men’s singles champion a ni a, MBA hriatpui inelna senior category-a champion thei naupang ber record a lo siam tawh - Pullela Gopichand Badminton Academy, Hyderabad-a zirlai a ni.

A hming Abi

Kum 16 mi a ni a, MBA Official Championship a champion thei naupang ber record lo siam tawh tu, Saron Veng tleirawl Abigail-i'n final hmuhnawm takah Serchhip tleirawl Lalrempuii chu deciding game ah 21-13, 17-21, 21-11 in a hneh a, a champion - Ralte Villa tana khel Rempuii chak zo lo mah se kum 15 chauh a la ni a, hmabak a nei êng hle.

Saron BC tana khel mek Abi hi ITM University Badminton Academy aṭanga coaching kal chhuak a ni a, Mizoramah pawl 12 zir tura lo hawin, "Ka school kalna Oxford Higher Secondary School ten min duhsakna an lantir ṭhin avangin ka lawm a ni," a ti.

Doubles lam

MBA Finals 2023-ah category pahniha champion pakhat a awm a, a hming chu Laldintluanga Tlau a ni. Republic Vengthlang tlangval hi Bungkawn tlangval Lalrinawma nen Bawngkawn BC tan mipa doubles-ah final an lut a, Ralte Villa BC player C. Lalramzauva leh Joseph VL Ringngheta te ṭang dun chu deciding game-ah 17-21, 21-16, 22-20 in an hneh.

Dintluanga hian mixed doubles-ah Zorinkimi, Chatlang BC nena ṭang dunin Ralte Villa BC tana inlan Joseph M Lalrinawma leh Lalrinhlui te chu 21-13, 21-18 in an hneh bawk. Women’s doubles inelna huangah Lalrinhlui leh Zothansangi, Ralte Villa BC te ṭang dun chuan Laldingpuii, Mission Veng Badminton Academy leh Lalrempuii, Ralte Villa BC te ṭang dun chu 8-21, 21-17, 21-12 a hnehin champion nomawi an hum haw bawk.