Miami Open champion Kvitova

Petra Kvitova chuan a vawi khat nan Miami Open nomawi a chawi. Inrinni zan final hmuhnawm takah Kvitova hian Elena Rybakina chu 7-6 (16-14), 6-2 in a hneh, set khatna tie break-ah hian point 30 ngawt a tling a ni.

Grand Slam vawi hnih champion tawh Kvitova hi kum 33 mi a ni tawh a, vanglai pel lam a ni ve tawh. Tun ṭuma a champion avang hian ranking point 1000 a hmuh belh a, tun kara world ranking chhuak tharah chuan 2021 September hnua a vawi khat nan a sang zual 10 zingah a tel ang.

Czech Republic nula hian Miami Open hi ṭum 13 a khelhna a ni a, kuminah chiah hian final a la lut - final a khelh hmasak berah a champion nghal tihna a ni a, atan chuan a lawmawm zual hle ang.

Kvitova chuan, "Elena Rybakina khan service a nei ṭha em em a, ka tan chuan lo dawn sawn a harsa ṭhin. Amaherawhchu, remchang ka hmuh apiang kha ka chhawr ṭangkai ve zel thung a, a tawpah chuan a vannei zawkah ka ṭang," a ti.

Wimbledon champion Rybakina hian final bikah pawh vawi 15 ngawt aces a siam, a khingpuiin ṭum nga bak a siam ve thei lo. Mahse, a zawna match 13 a chak tluang chu a tawp ta a, tunah chuan clay court lam atan rilru a hman ṭan a ngai dawn.