Intlansiak hmuhnawmah Max Verstappen a chak

Max Verstappen chuan nimin khan Australian Grand Prix-ah hnehna a chang, intlansiak hmuhnawm leh sawi hlawh takah hian vawi sarih champion tawh Lewis Hamilton chu pahnihnaah a thleng thung.

World champion Verstappen hian a hmasa ber aṭangin inelna a ṭan, mahse a tir lamah Mercedes driver pahnih Hamilton leh George Russell ten an rawn tlan pel, chetsualna hrang hrang vanga intlansiak vawi thum an tlan ṭhat hnuah erawh Max bawk a chungnung a ni.

Season hmang ṭha lo Hamilton tan pahnihna nih pawh thil lawmawm a ni phak, season hmasa aṭangin British tlangval hian chak ni hmel a la hmu lo a, podium lawn ringawt pawh a harsat ṭhin - tunah chuan beiseina a nei thei ve leh tawh ang.

Red Bull driver Verstappen erawhin tun dinhmuna a ṭha ber a nihzia a lantir a, championship hmahruaitu a nihna a sawhnghet bawk. Dutch tlangval chuan, "Bul kan ṭan fuh lo hle, lap hmasa berah khan fimkhur viau mah ila kan che thei tlat lo.

"Intlansiak hi chuan chetsualna a keng tel a, chumi tuar tute ka tawrhpui. Intlansiak tlan ṭhat a nih hnuah ka dinhmun ka siam thei a, a tawp thleng khan inthlahdah theih erawh a ni miah lo thung," tiin a sawi.

Season hmasa Australian Grand Prix-a hnehna changtu Charles Leclerc a chesual, lap hmasa berah tlan chhuakin inelna a hmachhawn zui thei lo. Lap 19-naah Russell-a car pawh a kâng a, a tan inelna a tawp zui ve bawk.

Driver dangin harsatna an tawh laiin Verstappen a che fuh a, a tan chuan Australian Grand Prix bika hnehna a chan vawi khatna a ni. Red Bull tan bik pawh Sebastian Vettel (2011) hnua an chak lehna hmasa a ni.

Tun season kal laiah intlansiak vawi thum a awm tawh. Bahrain leh Australian GP-ah Verstappen a chak a, Saudi Arabian GP-ah Sergio Perez a chak thung - Red Bull driver pahnihin midang tan hmun an la kian ve lo.

Beisei phak bakin Aston Martin an la che fuh chhunzawm. World champion vawi hnih ni tawh Fernando Alonso chu pathumna niin dawhsan (podium) lawn phak chin a ni leh a, a hnungah a teammate Lance Stroll a thleng thung.