Wimbledon an inhawng zau ta

Grand Slam pali zinga pakhat Wimbledon chuan season hmasa lam an kalphung an thlak danglam. Tun season atan chuan Russian leh Belarus player-te an inkhelh ve an phalsak tawh dawn a ni.

Russia leh Ukraine indona vangin infiamna peng hrang hrangah Russia leh a thurualpui Balarus chu hrek an ni. England tana tennis inelna ngaihhlut pawh hian heng ram pahnihte hi an tel ve a phal lo hial.

Mahse, nikuma Wimbledon thutlukna hi a fuh vak lo. Mipa leh hmeichhe tennis thuneitu sang ATP leh WTA chuan, ram ṭhenkhat an hrem avang hian world ranking point an pe duh bik lo, champion pawhin ranking point engmah an nei lo.

Thutlukna siam danglam ngei a ngai. All England Club (AELTC) chairman Ian Hewitt chuan, "Russia hmalakna hi keini chuan kan la do reng a, a tuartu Ukraine kan la thlawp reng bawk.

"Indonain thil hrang hrang a nghawng tih hre reng chunga hetiang thutlukna siam hi a hrehawm, mahse kan duh dan tak ni loa kan chet a ngaih chang pawh a awm," tiin Russian leh Belarus player tan kawng an hawnsak chungchang a sawi.

Russian leh Belarusian player-te hi inlan thei mah se, tournament khelh chhung hian indona chungchangah an ram an thlawp tih an lantir a remchang dawn lo thung a ni.