Barcelona an chak leh tawh

Spanish La Liga-ah Barcelona an sang fal zel a, Catalan club hian Inrinni zan khan an mikhualna ramah Elche chu 4-0 ngawtin an sawp - anmahni hnaih bertu Real Madrid aiin point 15 zetin an sang fal ta.

He thuziak i chhiar meuh chuan Barca leh Real inthlauhna erawh a danglam leh tawh mai thei. Nizan khan Real hian Real Valladolid an mikhual a, he thu buatsaih a nih lai hian result kan hre hman lo.

Elche khelmualah Barcelona tan striker chhuanvawr Robert Lewandowski bawk a langsar a, Polish striker hian goal hnih a khung - Lewy bakah hian tun hnaia sawisel tawk Ansu Fati leh Ferran Torres te chuan goal khat ve ve an khung bawk.

Barca tan Lewy-a'n tun season-ah league match 23 khela goal 17 khungin, assist vawi ruk a nei a, inelna hrang hrangah match 34 khela goal 27 khungin, assist vawi sarih a nei tawh. La Liga-ah goal khung hnem ber ni mekin, amah hnaih bertu Getafe forward Enes Ünal chuan goal 13 a khung tawh.

Catalan club hian Nilaini zanah Copa del Rey semifinal second leg an khel lehnghal dawn a, first leg-a 1-0 a an hneh tawh Real Madrid an mikhual ang.