Khuanu ruat loh Potter leh Chelsea an inṭhen

Lengzem hla lar tak pakhatah chuan, "Khuanu leng ruat loh di, engan dar ang kan intawn le, tun hnu lunglen tur dawn lo reng a," tiin lunglen thu hlain an sa a, inkawp rem lo tur intawn chu a 'na' an ti.

Chelsea pawhin hmangaih hmasa Thomas Tuchel banin, khuanu ruat a nih ngei beiseiin Graham Potter lalut mah se, khuanu ruat an ni lo a, Pathianni zanlai khan Chelsea leh Potter an inṭhen thu hriat a ni - lunglen thu erawh an sawi zui lo.

London club-in result ṭha an neih loh lai khan Potter-a'n ban mai a tawk tura ngaih a ni a, mahse, Chelsea thuneituten, "European football pawh khel dawn lo mah ila, Potter hi kan ban lo ang," an ti a, a lam an ṭang tlat.

Mahse, khawpui ri satliah emaw tih khan ruahpui a lo keng tel a, Chelsea a nuai - London club-in Potter hoa ruahpui do han tum ai chuan, nihliap zawnpui tur zawn chu a finthlak zawkah an ngai a, 'Mangṭha' tiin Potter an thlah ta.

A tawk ta e

Chelsea hian Inrinni zan khan Aston Villa chu Stamford Bridge-ah 2-0 in an ngam lo a, Potter-a hnuaia vawi 11 an tlawmna a ni - match 31 chiah a la enkawl! Hei vang hian Chelsea dawhtheihnain a tawp chin a thleng a, Potter an ban ta.

Villa laka tlawm Chelsea hi Premier League table-ah 11-na an ni mek a, point 11 ngawtin top four an hlat mek - tun season-ah player lei nan pound maktaduai 550 chuang an seng tih ngaihtuah chuan an result hi a mak a, Potter an ban hi a mak hran lo.

Chelsea chuan Potter ban a ṭul chu pawi an tih thu an sawi a, "Club-a inthlak danglamna a awm theih nan ṭha takin min thawhpui a ni," an ti bawk - Potter-a assistant Bruno Saltor chuan Blues enkawl hna hi a thawk lailawk ang.

London club neitute zinga mi pahnih Todd Boehly leh Behdad Eghbali te chuan thuchhuah inṭawm siamin, "Coach leh a mihring mihrinnaah kan zah em em. Professional tak leh dik takin engkim a ti a, hetianga inṭhen a ngai ta hi a pawi kan ti," an ti.

Hmabak hautak

Potter hian match 31 a kaihhruaiah Blues hi vawi 12 hnehna a chanpui a, Premier League bikah league match 22 kaihruaiin, match khata point 1.27 zel hlawhchhuahpui ang a ni a, Glen Hoddle nen match 20 aia tam Premier League-a Chelsea kaihruai chunga point hmu tlem ber an ni.

Chelsea hian zanin dar 12:30-ah anmahni ang thoa season hmang chhe tak Liverpool chu league match khel turin an mikhual dawn a, April 8 zanah Wolverhampton Wanderers lenchilhin, April 12 zanah Real Madrid nen Champions League quarterfinal first leg chu Santiago Bernabeu-ah an khel zui ang.

Boehly leh Eghbali chuan, "Kan hmabak la awmte thlir reng chungin, kan fans chhuanawm tak takte nen Bruno hi kan thlawp tlat dawn a ni. Premier League match 10 leh Champions League quarterfinal kan la hmabak a, a sang thei ang bera season kan khar theih nan theihtawp kan chhuah chhunzawm ang," an ti.

Kum 42 mi Bruno hian Brighton tan season sarih zet a khelh hnuah inkhelh chawlhsanin, Brighton-ah vek hian coaching a luhchilh zui a, Chelsea-in Potter an sawm khan London club lamah a pu hnungzuiin a pem a, tunah chuan Blues coach lailawk a ni dawn ta.

Sum sen

May 2022 khan Boehly-a'n a thawhpuite nen Chelsea an lei a, nipui transfer-ah pound maktaduai 255 vel zet seng nghalin, fan-te chu club neitu hmasa Roman Abramovich theihnghilh tir a tum. Mahse, September-ah thutlukna mak siam zuiin, coach ṭha Thomas Tuchel a ban.

Boehly-a'n Tuchel a ban lai hian league-ah parukna an la ni mek a, German coach hian thla 20 chhungin nomawi pathum a chawi hman a, heng zingah hian Champions League a tel - tuna Bayern Munich boss ni ta hnathawh hi a nep lo hle.

Mahse, Boehly-a'n Tuchel-a sulhnute chu hriatsak duh loin a ban a, tawnhriat nei tlem zawk Potter chu team langsar enkawl turin a lalut a, English coach lakluh nan hian Brighton hnenah pound maktaduai 21 a pe.

Chelsea hian Potter hi kum nga atan conrtract an ziahpui bawk a, âtthlak takin season khatah £12mtd an hlawhtir nghal bawk. Dan pangngai ang chu ni se Chelsea hian Potter hi £50mtd vel an ban avang hian an pek a ṭul tihna a ni a, mahse, English coach hian a hlawh hmabak zawng zawng la kher lo a, zângnadawmna ang zawnga sum dawn a pawi ti lo niin an sawi.

Barakhaih

Inrinni zan khan Chelsea thuneitute chuan Potter-a chungchang hi an rel ṭan tawh a, heti chung hian Pathianni chhun khan Chelsea press office lam chuan media ho hnenah email thawnin, Thawhṭanniah Potter chuan Liverpool nen an inkhelh tur chungchangah press a hmachhawn tur thu an tarlang.

Mahse, Chelsea-in mipui barakhaih thutlukna an siam zui a, club sporting director pahnih Paul Winstanley leh Laurence Stewart te chuan Potter hi biain, a hna aṭanga chawlhtir a nih thu an hrilh.

Chelsea hian Potter hi a mamawh ang pe leh, thlawp ṭha tawkah an inngai a, hei vang hian ban hi an inthiam lo hran lo, niin an sawi - January transfer-ah ringawt pawh English coach hi £300mtd dawn pek a ni a, an che na hle.

Mahse, Potter hian player tam lutuk lei kha a duh bik lo nia sawi a ni a, a phur an tihrih belh a ni ber - a tawpah a tuartu chu amah bawk a ni a, a pawi ta ber chu khuanu ruat loh an intawng hi a ni a, a match hmasa pakuaa tlawm an neih lohte chu thawnthu an chang ta.

Tuin nge Potter thlak ang?

Chelsea-in Potter an ban a, Brighton boss hlui hi Leicester City nen sawizawm nghal an ni - Foxes hi coach Brendan Rodgers ban hlim ve tho an ni a, mahse, Potter hian club dang enkawl lehnghal ai chuan chawlh hahdam phawt a mamawh zawk niin a lang.

Tun dinhmunah chuan Bayern Munich ban tak Julian Nagelsmann chu Chelsea nena sawizawm zinga hnaivai ber a ni a, kum 35 mi boss hian a professional career-ah coaching hna hi kum sarih vel thawk tawhin, tun hi hna nei loa a awm hmasak ber a ni.

Chelsea sporting director Paul Winstanley leh Laurence Stewart bakah technical director Christopher Vivell te chuan coach zawn hna hi an thawk dawn a, Stewart leh Vivell te hian RB Leipzig-ah Nagelsmann hi an thawhpui tawh a, Blues neitu zinga mi Boehly nen ṭhianṭha tak an ni bawk.

Tottenham Hotspur fan-te ngainat rawn Mauricio Pochettino hming pawh London club enkawl tura lam rik a ni a, mahse, Espanyol, Southampton leh Tottenham Hotspur coach hlui hi Spurs chuan an dawr leh tawh niin an sawi.

Kum 51 mi Poch hian nipui laia Paris Saint-Germain a chhuahsan hnuah club a nei leh tawh lo a, Spurs lamin an biaknaah kir a pawi ti lo, tih a hrilh niin an sawi a, Chelsea a zawm a rinawm loh.

Spain chhuahsan hlim Luis Enrique hming pawh lam rik a ni a, mahse, Spanish coach hi duh thlang thei dinhmuna ding a nih avangin thu duh ve tak Boehly-te nen an inrem ang em, tih chu zawhna awm thei tak a ni.

European football journalist Guillem Balague chuan, "Nomawi chawi tum leh a rilru mil zawng taka thil kalpui thei team lo chu zawm a duh lo a, Premier League-a kal duh mah se a duh ang tak club hi an tam lo ang," a ti.

Zinedine Zidane hming lam rik ni ṭhin mah se French coach hian chawlh rih a pawi ti lo nia sawi a ni a, Real Madrid, France leh Juventus chu hnar har a tih tur an nih thu an sawi.

Chelsea boss hlui Antonio Conte chu hna nei loin awm mah se Blues-ah a kir a rinawm chiah lo a, Brighton-a hnathawk ṭha em em mai Roberto de Zerbi, Brentford boss Thomas Frank, Atletico Madrid boss Diego Simeone, Foxes ban tak Brendan Rodgers leh Chelsea legend John Terry te chu Chelsea-in an thithlai theih zinga tarlan an ni a, engkim a chiang thuai dawn e.