Ka sulhnu vangin ka la cham - Klopp

Pathianni zanah Brendan Rodgers leh Graham Potter ban an ni a, tun season-a che chhe tak, mahse, ban thawm la ri ve miah lo chu Liverpool boss Jurgen Klopp a ni.

German coach chuan, "Tun season-a kan khelh dan avanga he hmuna la awm reng ka ni lo, tih hi ka chiang a, kan sulhnu avangin ka la awm ve mai mai a ni - Liverpool-a ka season hmasa ber chu ni ngat se, thil awmdan hi a danglam khawp ang," a ti a, Reds-in an la ban loh chhan chu a hai bik lo.

Klopp chuan, "Ban ka hlau lo a, Graham pawh khanin a hlau chuang lo ang - hlauh kha a ṭulna a awm lo a ni. He hmunah hian result thlen tura awm ka ni tih ka hria a, mite entawn tur emaw, an inbanga lem an ziahsak tur emawa awm ka ni lo a, result nei tura awm ka ni tih hi 100% in ka chiang.

"Liverpool ka pan hnua kan hlawhtlinna avangin ka la cham tih ka hria a, ka lo hlawhtlin tawhnain min chhan mai mai hi keipawhin ka duh bik lo. Tun hnaia kan khelh danah ka lawm lo a, mahse, hetiang hi a thleng ve ṭhin miau si.

"Talchhuah dan tur kan ngaihtuah a ngai a, chumi tur chuan theihtawp kan chhuah mek reng a ni," a ti - Liverpool hian zanin dar 12:30-ah Chelsea an lenchilh dawn a, Pathianni zanah Premier League hmahruaitu Arsenal an mikhual zui ang.

Reds hi league table-ah pariatna an ni mek a, palina Manchester United nen an inkarah point riat ngawt a awm mek avangin, season thara Champions League khel lo thei dinhmunah an ding mek a ni.

Klopp chuan hliam vanga rei tak a chawlh hnuah Luis Diaz chuan training zawm mah se, a la inlan theih loh tur thu a sawi bawk.