Leicester-in Rodgers an ban

Premier League club talbuai Leicester City chuan an coach Brendan Rodgers chungah rinna an nghat ngam tawh lo a, Celtic boss hlui hi a hna aṭangin an ban - Foxes hian an league match hnuhnung berah Crystal Palace chu 2-1 in an ngam lo a, relegation zone-ah an awm mek.

Foxes chairman Aiyawatt Srivaddhanaprabha chuan, "Tun season-a kan khelh dan leh result te hi kan beisei ang a ni lo a ni," a ti a, "Brendan-a hnuaia kan lo khelh tawh ṭhin dante thlirin, a chunga rinna nghah a, beih ho zel chu kan insiamṭhat theihna turah ngai mah ila, beisei angin thil a thleng thei ta si lo a ni.

"Hei vang hian league match 10 chauh khelh tur awm tawhah hian board chuan Premier League-a kan inhamtan zel theih nan kawng dang zawn mai a ṭulin a hria a ni. Kan hmabak match 10-a kan tih tur chu a chiang e - fans, players leh staff ten Premier League-a kan cham zel theih nan, inlungrual taka hna kan thawh ho a ṭul a ni," a ti.

Kum 50 mi Rodgers hian February 2019 khan Scottish Premiership nomawi a chawina Celtic chhuahsanin, Foxes hi a zawm a, kum 2021 khan an club chanchina a vawi khat nan FA Cup-ah champion nomawi chawipuiin, season tluan a enkawl hmasa pahnihah top five ni chungin season an khar ve ve bawk.

Mahse, tun season-ah Liverpool boss hlui hian beisei angin team a kaihruai lo - an league match hmasa 10-ah vawi sarih ngawt an tlawm a, mahse, World Cup chawlh neih a nih hmaa an league match hnuhnung pangaah vawi li chakin, beiseina thar an insiam.

Foxes hlim chhung erawh a rei lo takzet. World Cup zawha an league match hmasa pangaah vawi li tlawmin, vawi khat draw an nei a, February khan Aston Villa (4-2) leh Tottenham Hotspur (4-1) hneh ve leh mah se league match ruk chhung chu a zawnin an chak lo leh tawh - vawi khat draw an nei a, vawi nga an tlawm!

FA Cup fifth round aṭangin Blackburn Rovers chuan an pet chhuak a, League Cup quarterfinal-ah Newcastle United an ngam lo bawk - tun season-a an result thlir chuan Foxes-in Rodgers an ban hi thil mak a ni hran lo.

Hetihrual hian Foxes hian Rodgers hi tun season-ah an thlawp ṭha tawk lo. Nipui lai khan defender Wout Faes leh goalkeeper Alex Smithies chu an player lakluh awmchhun an ni a, January khan defender Harry Souttar (Stoke City) leh left-back Victor Kristiansen (FC Copenhagen) te lalut bawk mah se han ṭhatpui hluai tham an ni lo - winger Tete chu Ukrainian club Shakhtar Donetsk aṭangin loan-in an hawh bawk.

Foxes hian 2021-22 khan chhiah pek hmain pound maktaduai 92.5 an hloh a, a hma kum nena khaikhinin £61.3mtd-in an sum hloh zat hi a tam - nipui lai khan defender Wesley Fofana chu Chelsea hnenah £70mtd-in an hralh a, goalkeeper Kasper Schmeichel chuan Ligue 1 club Nice a zawmsan bawk a ni.

Srivaddhanaprabha chuan, "Brendan-a hnuaia kan hlawhtlinnate chu sawi ngai loin a lang nghal a, a enkawlna hnuaiah kan hun tawn hlimawm ber ber tawngin, amah leh a staff te chungah an hnathawh avangin kan lawm kumkhua ang," a ti a, khelmual pawnah pawh Rodgers chuan club tan hna ropui tak a thawh thu a sawi bawk.

Brendan Rodgers hian kum 2025 thleng King Power Stadium-ah contract a nei nia sawi a ni a, Foxes hian an ban manah pound maktaduai 10 vel chu an pek a ngai tura ngaih a ni.