Man United aia ṭha Newcastle United

League Cup final-ah Manchester United-in Newcastle United hnehin nomawi an chawi a, Pathianni zanah erawh Erik Ten Hag-a hote aiin Eddie Howe-a hote an ṭha zawk.

Magpies-in 2-0 in hnehna an chang a, mualneitu tan Joe Willock leh Callum Wilson ten goal an khung. Man United-in a chhanletna an nei lo a, chak phu zawk an chak.

Newcastle hian an elpui Man United an hneh avangin pathumnaah an invawrh chho a, season thara Champions League khel turin inrintawkna nasa tak an nei ang.

De Gea 'show' a tawk lo

Manchester United-in hma takah Wout Weghorst hmangin chance an nei a, Dutch forward hian goal zawnah a pet lo. Mikhual team hian first half-ah goal zawnah an pet lo a, an goal bawh a na lo.

Newcastle erawh an goal nawr a na thung. Alexander Isak-a ball tauh chu David de Gea-a'n a dang a, hemi per hi hnai tak aṭangin Joe Willock-a'n a khung lo - De Gea thoin a dang.

Allan Saint-Maximin a chak ṭha a, mikhual team tlarhnung tan buaina tham a tling. Newcastle an che ṭha a, minute 65-naah an phu ang goal an hlawh chhuak.

Isak-a ball ṭha um luttu Bruno Guimaraes-a cross ball chu a na hretin lang mah se Saint-Maximin-a'n a tauh let a, Joe Willock-a'n hnai tak aṭangin a khung.

Goal luh hnuah pawh Magpies tho an phur a, Joelinton-a ball tauh chu De Gea-a'n a dang hman. Hemi per hian crossbar fuhin a let leh lam chu Fabian Schar-a'n huai takin tauh mah se goal pawnah chiah a kal.

Minute 88-naah dinglam aṭanga Kieran Trippier freekick pet chu substitute Callum Wilson-a'n a tauh lut. De Gea tan dan ngaihna a awm lo a, Spanish keeper che ṭha mah se goal hnih a chhuah danah dem tur a awm lo.

UCL-ah Magpies?

Newcastle United tan nomawi beisei ngam chi a ni tawh lo a, chutihrualin Howe-a hote tan season thara Champions League khelh phak hi hlawhtlinna a la ni. Man United an hneh ṭum hian League Cup final-a an chhawr theih loh Nick Pope a inlan tawh a, goal a chhuah lo.

Magpies tana goal khung tam ber Miguel Almiron hliam vangin a inlan thei lo bawk a, heti chung hian Man United lakah inkhel an thunun. Tlarhnungah Dan Burn leh a ṭhiante an khawng ṭha a, team angin tharum an ngah tlang bawk nen Antony, Marcus Rashford leh Bruno Fernandes te an ngawi chawi hle.

Newcastle manager Eddie Howe chuan, "Point thum hlu bik a ni a, hnehna chang turin kan khel ṭha tel bawk. Ka player-te an chak ṭha a, an ṭhatna ang takin tharum nena khelh a, pressure pek kha kan duh. Bench aṭanga lutte pawhin hna ṭha tak an thawk a, kan khel ṭha tlang a ni," tiin a sawi.

Magpies hian UCL khel tura an elpui zinga mi Man United chiang takin an hneh thei a, season tharah Europe inelna sang ber an khel a nih pawhin thil mak a ni tawh lo ang.

Man Utd an zuih

Man United-in League Cup nomawi an chawi hnuah Premier League-ah result an nei chhe hle. Ten Hag-a hote hi Liverpool lakah 7-0 in an tlawm a, Old Trafford-ah Southampton an hneh thei lo a, Magpies lakah an tlawm.

League match hnuhnung pathumah Man United-in chak an nei lo a, season thara UCL khel lo thei dinhmunah an ding. Dutch manager Ten Hag chuan, "Ka sawi hreh khawp mai, dik taka sawi chuan an khel ṭha zawk. Keini aiin chak châkna an nei lian zawk a, chuvangin an chak a ni," tiin a sawi.

Man United hian hrem vangin Casemiro an chhawr thei lo a, Brazilian midfielder tel lo hi chhuanlam tling ni bawk mah se St James Park-a an khelh dan erawh season thara Champions League khelh tum tan chuan a chhe lu lai hret a ni.