Hammers-in Saints buaina belhchhah

West Ham United-in Pathianni zan khan an mualah Southampton chu 1-0 in an hneh a, goal awmchhun hi Nayef Aguerd-a khung a ni.

Saints hian Hammers lakah point an hlawhchhuah loh avangin table mawngphahah an awm chhunzawm a, point 23 hmuin a him china awm Leeds United chu point thumin an pha lo.

Minute 25-naah Thilo Kehrer freekick chu Aguerd-a'n ṭha zetin a tauh lut a, goal erawh VAR hmanga enlet a nih avangin pawm lawk a ni lo. Hun rei tak en hnuah goal-ah pawm a ni a, goal dang a lut tawh lo.

Hammers hian hnehna chang mah se an khelh ṭhat ṭum a ni bik lo a, goal zawnah vawi hnih chiah an pet. Inkhelh banah West Ham boss David Moyes chuan, "Kan result-ah ka lawm. Kan khelh ṭhat zawk ṭuma chak loh ṭum hi kan ngah a, tun ṭumah chuan kan duh zawk result kan hlawh chhuak," tiin a sawi.

Southampton manager Ruben Selles chuan, "Goal chhuah hi a thinur thlak a, a bik takin set play aṭanga goal chhuah chu a lawmawm loh. Goal leh VAR thutlukna hi chu vanneih ṭum a awm a, kan vanneih loh ṭum a ni," tiin an vanduai thu a sawi.