Bayern hmaah SC Freiburg

Bayern Munich an la treble champion thei a, zanin dar 12:15 hian DFB Pokal quarterfinal-ah SC Freiburg an mikhual dawn. Thomas Tuchel hnuaiah Bavarians-in Borussia Dortmund chiang takin an hneh nghal a, Chelsea manager hlui tan zanin inkhel tur hi player siksawina remchang a ni thei ang.

Dortmund lakah Liverpool aṭanga an lakluh Sadio Mane, Manchester City aṭanga loan hmanga an hawh Joao Cancelo, Germany international Serge Gnabry leh Jamal Musiala bakah Ajax aṭanga an lakluh Daley Blind te bench-ah an awm.

Cancelo hi minute 79-naah luhtir a ni a, inkhelh banah a lungawi loh avangin chak lawmnaah pawh a tel lo niin sawi a awm. Bayern Munich sporting director Hasan Salihamidzic chuan, "Cancelo hi player ṭha tak a ni a, inkhelhna hun pawh a nei ang. Chutihrualin a lungawi loh hi thil lian tham a ni lo a, player-te an khelh loh a, an lungawi loh hi chu dan pangngai a ni," tiin a sawi.

Tuchel-a'n Freiburg hma-chhawn tura Cancelo bakah Gnabry leh Musiala te bul a ṭantir a nih pawhin thilmak a ni lo ang. Bayern hian kartawpah Freiburg tho league-ah an hmachhawn dawn a, April 11, Thawhlehni zanah Manchester City hmachhawn turin Eithad Stadium an tlawh zui ang.