Playoff khel turin Knicks an tling

New York Knicks chuan Washington Wizards 118-109 in an hneh - NBA team zinga a thiam zual inelna playoff khel turin Knicks hi an tling chiang nghal ta chiah bawk.

NBA kalphung an siam danglam hret a, regular season khelh zawha a sang paruk chu playoff khel tur hian an tling nghal. Pasarihna aṭanga 10-na te chuan play-in hmangin playoff khel tura hmun ruak pahnih an inchuh leh dawn a ni.

Eastern Conference aṭangin hmahruaitu Milwaukee Bucks, Boston Celtics, Philadelphia 76ers, Cleveland Cavaliers leh New York Knicks te hi playoff khel turin an tling tawh.

Nimin zing inkhel dangah Toronto Raptors chuan Charlotte Hornets 128-108 in an hneh, 2019 NBA champion hian Eastern Conference aṭanga play-in khel turin an dinhmun an tichiang ve nghal bawk.

Phoenix Suns tan Kevin Durant chuan point 35 neiin Oklahoma City Thunder lakah a team chu 128-118 in hnehna a chanpui a, a zawnin match nga hnehna an chang ta. Thunder erawh an match hnuhnung pasarih zinga pangaah an tlawm.

Anthony Davis-a'n point 40 a nei a, tun season kal laiah match khata point a neih hnem ber ṭum tawngin Los Angeles Lakers chu 134-109 in Houston Rockets lakah a chakpui. LeBron James chuan triple-double (18 points, 10 rebound, 11 assist) a nei ve bawk.