A vawi khat nan Bezzecchi a chak

Marco Bezzecchi chuan a vawi khat nan MotoGP huangah hnehna a chang. Italian rider hian Pathianni zana tlan zawh tak Argentina Grand Prix-ah hnehna a chang a, atan chuan mellung pawimawh bik a ni.

Tlan kawng huh deuh karah kum 24 mi Bezzecchi hian kawng kawi hmasa ber aṭangin hma a hruai a, harsatna lian tam tawk loin a chak tlang. A hnungah hian Ducati bike khalhtu Johann Zarco a thleng.

Bezzecchi chuan, "A nihna tak sawi chuan, intlansiak tura in aṭanga ka chhuah lai khan hnehna ka chan hi ka ring phak lo. Tlankawng kan thlen hnuah erawh nuam ka tiin bike ka nei ṭha bawk a, engkim mai kha ka tan a fuh vek," a ti.

Champion lai Francesco Bagnaia chu tlan hmabak lap riat an la neih laiin a chesual a, intlansiak hmachhawn chhunzawm mah se a insiamṭha phak tawh lo. Portuguese Grand Prix-ah hnehna chang mah se chanchin ṭha a nei chhunzawm thei ta bik lo a ni.

Bagnaia hi a chetsual lai hian Bezzecchi nen an inum lai a ni a, chesual loin tlan ṭha tlang pangngai ni se la chuan pakhatna emaw pahnihna emaw a ni phakin a rinawm, mahse a dinhmun bakah championship lama a dinhmun thlengin a hloh ta zawk.

Ducati rider Bagnaia chuan, "Ka chetsual dan kha a mak khawp mai, keimah ngei pawhin ka hrethiam lo. Nikum aiin kuminah hian nasa takin hma ka sawn niin ka hria a, mahse intlansiak pahnihna leka ka chesual nghal mai chu a mak khawp mai," a ti a, a tihsual siamṭhat nghal a tum dawn.