Miami Open champion Medvedev

Daniil Medvedev chuan tun season kal laia a nomawi palina ni turin Miami Open title a la. Pathianni zana final khelhah Russian tlangval hian Jannik Sinner chu 7-5, 6-3 in a hneh.

World number 1 hlui Medvedev hian set khatnaah a khingpui service vawi hnih a chhuahsak a, inkhel pumpuiah ama service ṭum hnih hloh ve mah se vawi li a chhuhsak theih avangin harsatna lian tham a tawk lo.

Kum 27 mi Medvedev chuan, "Inkhel hautak taka hnehna ka chang thei hi ka lawm. Khua a lumin boruak a hnawng em em a, boruak awm dan kha hriatthiam a harsa hle, keimah ang bawkin Jannik khan inkhelh harsa a ti ve bawk.

"Tun anga tournament lianah hian kum chanve chhung vel chu hnehna ka chang ta lo, tunah chuan ka hun a lo thleng ve leh ta. Ka rilru leh taksa pawh a hma aiin a paukhauh tawh hle," a ti.

Medvedev hian Grand Slam dawta inelna ngaihhlut Masters 1000 title hi panga a la tling ta a, kuminah Miami Open hma hian Dubai, Doha leh Rotterdam Open lamah hnehna a lo chang tawh bawk.

Hard court hi inkhelh nuam a tihna hmun a ni a, inelna lian US Open-ah pawh tun hmain a lo champion tawh. Sinner nen bik hian ṭum ruk inkhel tawhin a la chak vek, sulhnu a nei ṭha hle a ni.

Miami Open-ah hian Carlos Alcaraz pawh a inlan. Mahse, Spanish rawlthar hi semifinal-ah Sinner hneh loin a tla a, tun kara world ranking chhuak tharah chuan a chung berah Novak Djokovic a awm leh tawh ang.