Benzema hattrick nen Real Madrid an chak

Real Madrid-in fal lutuka Barcelona awm an rem ti lo a, Pathianni zan khan league hmahruaitu Barca nena an inkar sawr zim turin hnehna an chang - an mikhual Real Valladolid chu 6-0 ngawtin an sawp.

Real tan Karim Benzema chuan hattrick a siam a, Rodrygo, Marco Asensio leh Lucas Vazquez te chuan goal khat ṭheuh an khung bawk - Santiago Bernabeu-ah Valladolid tan Roque Mesa leh Kike Perez ten chance nei mah se, post an tihper.

Madrid khaw club hian minute 22-na aṭangin goal an khung ṭan a, Brazilian forward Rodrygo chuan Asensio siamsak chu goal-ah a chantir - an hawikir tawh lo.

Minute 29-naah Benzema chuan Vinicius Jr ball cross duhthusam chu tauh lutin an goal hnihna a khung a, minute thum a liam hman awrh tihin Vinicius siamsak bawk chu an goal thumna ni turin a khung zui.

French striker hian a la duhtawk lo cheu - minute 36-naah overhead kick hmangin a khung belh a, Real tana a khelh hnua a vawi khat nan first half-ah hattrick a siam.

April 1992 khan Fernando Hierro hian 7-0 a Espanyol an hneh ṭumin,minute ruk chhungin hattrick a siam a, Benzema hian minute sarih chhunga siamin Hierro hnua La Liga-a Real tana hattrick siam rang ber a ni.

Chawlhlawk hman a nih meuh chuan Real hian 4-0 in hma an hruai tawh a, second half-ah Asensio leh Vazquez ten belhchhah ve lehin, Real an chak chiang hle.

Rodrygo-a'n goal khat chauh khung mah se Benzema leh Asensio goal khung tur a siamsak a, a goal khung dang chu Video Assistant Referee (VAR) hmanga en a nih hnuah Vinicius handball vangin pawm a ni lo bawk - woodwork a la tihper cheu!

Real boss Carlo Ancelotti chuan hattrick siamtu Benzema chu minute 65-naah la chhuakin, Eden Hazard a luhtir a, Belgian forward tan September 11, 2022-a Real Mallorca a hmachhawn hnua Madrid khaw club tana league match a khelh leh hmasa ber a ni.

Santiago Bernabeu-a beiseina sang tak nena pem Hazard hian hliam vangin Real-ah beisei a phak lo a, Valladolid laka a che vel erawh mit a ti tlai leh tawh hle - hun pek belha Vázquez goal khung tur chu a siamsak a ni.

Real fans tam takin Hazard lo kir leh ta chu an lawm thu social media hrang hrangah an pholang a, Chelsea forward hlui hi a khelh ṭhat bawk avangin an club tana inlan zel tura an duh thu thlengin an tarlang.

Madrid boss Ancelotti chuan, "Eden hian chawlh lai khan ṭha takin training a nei a, khel rei lo mah se a ti ṭha takzet a, assist pawh a nei hial. A training ṭhat phawt chuan chance a nei zel ang," a ti - Hazard hian tun hnaiah Ancelotti nen an inbiak ngai loh thu a sawi a, tunah erawh an boruakin ṭhat lam a pan leh ta niin a lang.

Pathianni zan La Liga inkhel ngaihven hlawh dangah Atletico Madrid chuan 1-0 in Real Betis an hneh a, Angel Correa chuan inkhela goal awmchhun khungin, table-a pathumna dinhmun an sawhnghet.