Milan lakah Napoli an tlawm

Serie A champion tura dinhmun ṭha tawk tak Napoli chu nomawi kawl mektu AC Milan lakah 4-0 in an chak lo, tun season league match bikah Luciano Spalletti naute hi ṭum thum an chak lohna chiah a ni.

Chak lo mah se Napoli hi pahnihna Lazio aiin point 16 teh meuhin an la sang fal tho, hnehna changtu Milan hi pathumnaah awmin, season thara Champions League khel turin an dinhmun an sawhnghet ve bawk.

Milan tan Rafael Leao-a'n goal hnih a khung a, a kar lakah Brahim Diaz inlarin Alexis Saelemaekers chuan an goal lina leh chak nemnghehna ni bawk chu a khung ve thung.

Tun hnaiah Napoli an che fuh lo zeuh zeuh, an league match hnuhnung paliah vawi hnih an chak lo. Season tir lam kha chuan match 24 aṭangin vawi khat chiah tlawm an nei, a bul an ṭhan ṭhat em avangin midang an umphak theih an ni rih lo.

Milan nen hian Champions League quarterfinal an khel zui leh mai dawn. Napoli coach Spalletti-a'n Pathianni zan inkhelah hian a player ṭha zawng zawng a chhawr lem lo - UCL lamah chuan thapui an thawh tawh thung ang.

Spalletti chuan, "Kan khel ṭha tawk lo tih chu ka hria, chutih rualin Milan khan sawisel tur awm lo khawpa ṭhain an khel ve thung a ni," a ti. Milan coach Stefano Pioli chuan ṭha taka season hmawr an bawk theihna tura bul ṭanna a nih thu a sawi ve thung a ni.

Inkhel dangah AS Roma chuan Sampdoria 3-0 in an hneh. Roma tan hian Georginio Wijnaldum, Paulo Dybala leh Stephen El Shaarawy ten goal khat ṭheuh an khung a, point thum hlu tak an hlawh chhuak.

Roma manager Jose Mourinho chuan, "First half-ah ṭha taka khel chungin goal kan khung thei lo kha a pawi hle a, a nihna tak sawi chuan player tam zawk kan nih kha kan chhawr," a ti.

Second half minute 52-naah Sampdoria defender pawimawh Jeison Murillo chu hnawh chhuah a ni a, Colombian international awm loh hnuah Roma hian goal thum an khung, player 11 ve ve in khel tluan ta se result a danglamin a rinawm.Milan lakah Napoli an tlawm