PSG chak loh niah Messi an au el

Pathianni zan Ligue 1 inkhelah Paris Saint Germain chu Lyon lakah 1-0 in an chak lo a, he inkhelah hian PSG ṭantu ṭhenkhat chuan Lionel Messi an au el hial - Argentina captain hma hun ti chiang lo zualtu a ni theiin a rinawm.

Paris khawpuia inkhelah hian Bradley Barcola chuan minute 56-naah goal awmchhun a khung a, striker Alexandre Lacazette chuan goal an khung hma hian penalty a hlah bawk a ni.

Kylian Mbappe-a'n hun tawp dawnah si phurh a sut teuh hle a, mahse ani pawh a vanneih zan a ni bik lo. Kum 2023 chhungin PSG hi vawi sarih ngawt an chak lohna a ni ta, insiamṭhat an mamawh takzet.

World Cup hma kha chuan Paris club hi a zawnin match 22 chhung tlawm loin an kaltluang. Football inelna lian leh ropui ber an khelh zawh hnuah erawh inelna hrang hrangah match 18 khelin vawi sarih an tlawm!

Chak lo mah se PSG hi Ligue 1 hmahruaitu chu an la ni tho. Amaherawhchu, Argentina tana khel ṭha thei tak Messi lak aṭangin an duh leh beisei ang an hmu tawk lo tih a hriat a, contract thar ziak tura an indawrna pawh a nghawng hial ang.

Nikum kum tawp lam khan Messi leh PSG hi contract thar chungchangah a thuphungin an inrem tawh, thua an la ziah fel loh chhan chu Messi hian PSG hmalak tum dan, a bik takin team din an tum dan a ngaichang niin an sawi.

Tun season tawp rualin a contract a zo dawn, tun hnaia thuthang thar berah chuan a club hlui Barcelona lamah a kir leh mai thei tih a ni. Barca vice president Rafael Yuste-a'n indawrna an neih ngei thu pawh a sawi chhuak.

Messi hi kum 35 mi a ni tawh a, football khawvelah hun rei a nei tawh bik lo. Chutihrualin Argentina chuan an captain hi World Cup 2026 khelhtir ngei an la duh, hei vang hian club lamah ṭha taka a khelh ngei an la duh ang tih a chiang.