Chak châk lo Chelsea leh Liverpool an inhnehtawk!

Graham Potter bantu Chelsea-in coach lailawk Bruno Saltor hoin Thawhlehni zan khan Liverpool an mikhual a, season hmang chhe tak team pahnih hian goal an khung lo - 0-0 in an inhnehtawk.

Mizoram lam aṭang chuan team pahnih inkhelh ṭan hun hi zanlai dar 12:30 a ni tawh - inkhel entu tam zawk chuan inmutthluk san mai thei. Kan dem lo che u, Premier League team pahnih hian inkhel hmuhnawm min chhawpsak tlat lo alawm!

Chelsea tan Reece James leh Kai Havertz ten goal an khungah inngai mah se video assistant referee hmanga ennawn a nih hnuah pawm loh ve ve a ni a, Stamford Bridge-a lenglut Liverpool an vannei takzet.

Reds-in khualmualah hnehna an chan zawh loh avangin season thara Champions League khelh a harsa sawt dawn tih a chiang a, Chelsea coach thar ni tur tan siamrem ngai a tamzia a lang nawn bawk.

Heiham!

Liverpool boss Jurgen Klopp-a'n Chelsea laka player a rem dan aṭangin London club a dah sang lo tih a lang a, a forward chhuanvawr Mohamed Salah, Cody Gakpo, full back pahnih Trent Alexander-Arnold leh Andy Robertson te chu bench-ah dahin, Virgil van Dijk chu damlohna avangin squad-ah a awm lo bawk.

Pathianni zana Arsenal hmachhawn chhunzawm tur Klopp-a'n Blues aiin Gunners a hlau zawk tiin a sawi theih a, season an hman ṭhat tawk loh avangin an ṭhat dan tur zawn nan Chelsea a hmang, tiin a sawi theih bawk - a eng zawk pawh ni se, mahni muala khel Chelsea tan chuan a tlawm thlak ve ve!

Stamford Bridge-a team hlauhawm zawk erawh Blues an ni a, Liverpool hian Chelsea tlarhnung an chhaih mangang meuh lo, tiin a sawi theih.

Blues tan Mateo Kovacic chuan goal khungna remchang nei mah se Ibrahima Konate chuan goal line aṭangin a lo dan chhuahsak a, Croatian midfielder hian Alisson chauh a hmachhawn chungin a pet goal lo bawk.

Chelsea an vanduai

Blues tan Havertz chuan hnai set sawt aṭangin khungna remchang nei mah se Alisson chuan ṭha zetin a dang a, an goal khung chhunah video assistant referee hmanga en niin, an pawmsak lo ve ve bawk!

Minute 25-naah Reece James chuan goal hmahruai a khungah a inngai a, mahse, VAR hmanga ennawn a nih hnuah goal luhna tura inrawlh Enzo Fernandez chu a offside tih hmuh a ni a, pawmsak an ni lo.

Chelsea tan Havertz chuan second half ṭan aṭanga minute linaah goal a khung a, mahse, hei pawh VAR hmanga ennawn a ni - German forward pet hmasa chu Alisson hian dangin, a per chuan Havertz a fuh a, goal-ah a lut.

Mahse, ball hian Havertz-a kut a per a, handball vangin pawm theih a ni lo. Blues tan Joao Felix ball thiamzia hmuh turin a awm a, mahse, Portuguese forward hian awmze neiin tlarhmaah hna a thawk lo.

Insiamṭhat ngai

Liverpool-in season hmasaah season tawp dawn thlengin quadruple champion nih an beisei a, inelna an telnaa match khelh theih zawng zawng chu an khel vek - season ṭantir khan an beisei ber tur chu Champions League khelh phak, tiin sawi ila, tam tak nuih a za ang.

Mahse, season tawp a hnaih meuh chuan hei hi thudik a ni a, Liverpool beisei san theih ber chu palina ni chunga season khar a ni - Chelsea nen an inhnehtawk leh tak avangin hei pawh a harsa tawh dawn.

Chelsea-in league-a Wolverhampton Wanderers an hmachhawn zawhah Champions League quarterfinal khel turin Real Madrid an lenchilh zui dawn a, tuna zawhna awm ber chu, Real lakah coach thar an nei hman ang em, tih chu a ni a, tuin nge Real lakah goal khung ang? tih pawh a chhanna pek harsa tak a ni.

London club tan lawmna tur erawh a awm - August, 2022 hnua a vawi khat nan N'Golo Kante chuan Blues tan bul a ṭan ve leh ta a, malpui hliam vanga chawl reng midfielder hian a thiam a lo la theihnghilh lo a, Blues chhan thei an awm a nih chuan French midfielder hi a ni ang.