€400m chuang hlawh thei Messi

Lionel Messi chu Saudi Arabia club Al-Hilal-in euro maktaduai 400 hlawh turin an dawr a, Argentina captain hian a pawm a nih chuan footballer zinga hlawh tam ber lawrlak a ni ang.

Al-Hilal hi Saudi Pro League-ah hmahruaitu an ni mek a, Cristiano Ronaldo telna Al-Nassr chungah an awm mek. Al-Nassr-ah hian Ronaldo hi euro maktaduai 200 vel hlawha ngaih a ni a, Messi hian a elpui let hi a hlawh theih dawn.

Amaherawhchu Lionel Messi hian Copa América 2024 hma hi chu Europe-a khelh a la duh niin sawi a ni a, Al-Hilal sawmna hi a hnar a rinawm. Tun season tawp rualin Paris-a Messi contract hi a tawp dawn a, season thara Argentina captain khelhna tur hi an inrinsiak mek.

PSG-in Messi hi chelh an tum a, kumina an hlawh pek ang tho pek an la pawiti lo. Chutihrualin PSG home match hnuhnung pahnihah club ṭantuten Messi hi an au el a, Argentine forward hi a lungawi lo. Hemi a nih avang hian French club leh Messi hi inremna nei lo thei dinhmunah an ding.

Barcelona-in an club legend Messi hi laklet an duh a, Xavi-a'n a ṭhianpa hi a enkawl châk. Catalan club-in Financial Fair Play dan an zirchian hnuah Messi hi an dawr tura ngaih a ni. Messi hi MLS lama kal tura sawi a ni bawk a, tun nipui transfer tingaihnawmtu ber a ni ang.