Mumbai City-in Champions League an khel dawn

India ram aṭanga Champions League khel tur zawnna, AFC Champions League playoff-ah Mumbai City chuan 3-1 in Jamshedpur FC an hneh a, season tharah AFC Champions League an khel dawn.

Mumbai City tan Ahmed Jahouh (penalty), Alberto Nog

uera leh Vikram Partap Singh ten goal khat ṭheuh an khung a, Men of Steel tan Eli Sabia chuan si phurh sut ṭhen mah se goal dang an khung loh avangin 3-1 in an tlawm.

Khelh chhan

Jamshedpur hi season hmasa khan ISL league winner an ni a, dan pangngai ang chuan Champions League khel tur an ni. Mahse, Asian Football Confederation-in kalphung an thlak a, hei vang hian season hmasa Champions League kha khelh zawh a la ni lo a, May 2023-ah khelh zawh a ni dawn chauh.

Hei vang hian JFC an inlan hman lo a, ISL league winner thar an awm leh tak bawk si avangin playoff hi khelh a ni ta a ni. Season tharah chuan September aṭanga group stage khel ṭanin, May-ah an khel zo ang.

Hei le Mumbai

Manjeri, Kerala-a playoff inkhel hmuhnawmah JFC tan Ricky Lallawmawma chuan chance duhawm nei mah se a chhawr thei lo a, Mumbai tan Lallianzuala Chhangte chuan chance duhawm nei mah se TP Rehenesh chuan dangin woodwork a tihper bawk.

Second half-ah Ricky a chesual a, Durtlang tlangval hian LZ-a a tihtluk avanga penalty chawiin, Jahouh chuan goal-ah a chantir - Noguera leh Vikram ten an chhunzawm a, JFC tana Eli Sabia goal khungin awmzia a nei phak lo.

Chak kan inbeisei a, mahse, tun season-a kan khelh tawh dan en chuan a awlsam dawn lo tih kan hria. Tharum an hman nasat bakah an game a direct em em a, chuvangin inthlahdah chi a ni lo tih kan hria. Champions League khelh leh kan châk em avangin, kan vaiin kan theihna zawng zawng kan hlan a ni. Ka khel ṭha thawkhatah ka inngai a, mahse, goal khat tal khung tur chu niah ka inngai.
- Lallianzuala Chhangte,
Mumbai City forward

Season hman dan thlirin chak ka beisei sa a, Indian player leh foreign player pawh ni se, kan nei ṭha zawkah ka ngai a, kan squad a chhah zawk a ni. Bench aṭanga lo lutah pawh danglamna thlen thei an awm nual a, kan vanneih phah a ni.
- Lalengmawia Ralte,
Mumbai City midfielder

Penalty chawitu ka ni a, pawi ka ti. League-ah kan intum tawk ṭhin avangin kan ti thei viau turah ka ngai a, mahse, goal kan chhuah hmasa kha kan tuar ta a ni.
- Ricky Lallawmawma,
Jamshedpur FC

Kan chak ve theih mai beiseina ka nei a, mahse, second half-ah foreigner nei ṭha zawk danglamna a lang niah ka ngai.
- Laldinliana Renthlei, Jamshedpur FC