Junior Boys champion Lawngtlai DFA

Mizoram district hrang hrang inelna - Mizoram Inter-District Junior Boys Football Championship 2023-ah Lawngtlai District Football Association team an champion.

Nimin khan Kolasib Sports Stadium-ah final khelh niin, champion turin Lawngtlai DFA hian Saitual District Football Association team chu 2-1 in an hneh a, team 11 inel zingah an chungnung ber.

Final lut turin Saitual hian goal an chhuah miah lo, mahse nomawi inchuhna inkhelah Saitual goalkeeper chetsual vangin Lawngtlai lamin Rothangpuia hmangin goal hmahruai an khung.

Second half tir lamah Saitual tan VL Malsawmdawngkima chuan corner aṭanga ball kal a tauh lut a, 1-1 niin team pahnih an inkhel tawk chhunzawm hle. Minute 55-naah Lawngtlai tan Lalfamkima'n freekick aṭangin chakna goal a khung.

Kolasib-a inelna neihah hian Lawngtlai hi team hmuhnawm an ni a, final kalkawngah hian champion lai Siaha chu semifinal-ah an hneh a, an match hmasa lamah Aizawl, Serchhip leh Khawzawl te an hneh vek bawk.

Final-in ngaihhlut an hlawh - Saitual aṭangin a hmuna inkhel en tur mi 30 chuang an kal a, an awmna hla deuh mah se Lawngtlai pawh an DFA hruaituten a hmunah an kalchilh bawk a ni.