Vawiin tlai dar 5:00-ah Trau Vs Aizawl FC

Hero Super Cup-ah vawiin tlai dar 5:00 hian Mizo club Aizawl FC-in Trau an hmachhawn dawn. Manjeri Payyanad Stadium-a I League club pahnih inkhela chak zawk hian group stage an lut ang.

Super Cup inkhel dangah Real Kashmir leh Churchill Brothers te zanin dar 8:30 hian an inkhel bawk dawn. Nizan khan second qualifying match hnih dang khelh a ni a, result kan hre hman lo.

Inkhel tur chu

Inelna hi knockout hmanga khelh a nih avangin Mizo club-in I League nen an khelh dan hmang an thlak hret a rinawm a, coach Caetano Pinho-a'n a ho dawn loh avangin assistant coach Victor Lalbiakmawia kaihhruainaah an khel dawn.

Knockout inelnaah tlarhnung tihphui a pawimawh avangin coach Victor-a'n tlarhnung a thuam chak deuh a nih pawhin a mak lo ang. Nikum November thla khan Aizawl FC leh Trau hi RG Stadium-ah 1-1 in an inhnehtawk a, kumin February thlaah erawh Imphal-ah Trau hian Mizo club hi 3-1 in an hneh.

I League khelh zawh takah Aizawl FC hi pasarihna an ni a, an khingpui tur Trau hi palina an ni thung. Hemi a nih avang hian Manipur club hi a buk rit zawk an ni dawn a, chutihrualin Mizo club tan beisei bo a ni lo thung.

Engtin zel?

Aizawl FC hian Super Cup khel turin I League squad aṭangin player 20 chauh a thlang a, chumi awmzia chu Kerala-ah player 20 chauh an kal. Chutihrualin knockout a nih avangin player 20 hi inelna hmachhawn tura mamawh tawkah a ngaih theih.

Mizo club-in striker Henry Kisekka an chhawr thei dawn lo a, Ugandan striker hi a fanu damlohna avangin a khaw lamah haw. Player 20 zingah foreigner pali Akito Saito, Eisuke Mohri, Emmanuel Olugbenga Makinde leh Ivan Veras te an tel.

Mizo club khelh ṭanna tur hi second qualifying round a ni a, Manipur club hi an hneh thei a nih chuan group stage-ah ISL club Hyderabad, Odisha leh East Bengal te nen an inhmachhawn thei dawn a ni.