Goal khungtu pahnih an hnawt chhuak

Juventus leh Inter Milan te Coppa Italia semifinal first leg-ah 1-1 in an inhnehtawk a, he inkhela goal khungtu pahnih Juan Cuadrado leh Romelu Lukaku te chu inkhel tawp dawn lam boruak sangah hnawhchhuah an ni.

April 26 zanah second leg khelh a ni dawn - San Siro boruak chu a sang dawn tih a chiang nghal. Nizan khan Cremonese leh Fiorentina te chu semifinal lehlamah an inhmachhawn ve thung a, result kan hre hman lo.

Allianz Stadium-a inkhelah goal kan hmu har hle, minute 33-naah Juventus tan Juan Cuadrado chuan goal hmahruai a khung chauh a, chak nan an hman zui mai theih pawh a rinawm hman hle.

Mahse, Gleison Bremer-a'n hand ball vangin penalty a chawi a, minute 90+5-ah Lukaku chuan si phurh sut nan a hmang, a goal khung hi Old Lady ṭantute hmaah uchuak takin a lawm a, buaina chhuak zuiin Belgium international hi hnawhchhuah a ni.

Buaina a la tawp mai lo, hamrik hnuhnung ber a rik hnuah pawh team pahnih player an la buai zui. Inter captain Samir Handanovic leh Cuadrado te chu hnawhchhuah an ni zui ve leh a, result erawhin a danglam phah tawh chuang lo.

Coppa Italia champion lai Inter Milan hi tun hnaiah an khel ṭha tawk lo, an match hnuhnung pangaah chak ni hmel an hmu lo. Inter manager Simone Inzaghi chuan, "Lukaku-a'n goal khung a lawm dan kha ni danga a tih ṭhin dan tho a ni.

"Second leg-ah Lukaku leh Samir Handanovic te kan chhawr thei dawn lo tihna a ni a, kan tan chuan channa lian tak a ni," a ti. Nerazzurri coach chuan Lukaku-a red card hmuh chu thuneitu lam hnenah an khinlet tur thu a sawi bawk.

Juventus coach Massimiliano Allegri pawhin a tawp thil thleng pawi a tih thu sawiin, "Inkhel hun tam zawkah khan boruak chhia leh ṭha lo a awm lo, a tawp kharna a mawi lo kha pawi ka ti hle.

"Tun thla chhung kan inkhel nawn leh dawn, a inkarah hian inbuatsaihna ṭha tawk tak kan nei tur a ni ang. Inter nen kan inkhelh leh hma hian Serie A match li bakah Sporting nen Europa League kan khel dawn," a ti.

Juve tan second leg-ah Cuadrado a tel thei dawn bik lo. Mahse, Italian forward ṭha Federico Chiesa chu a inkhel leh thei tawh a, coach Allegri chuan Chiesa chungah rinna a nghat ngam thlap tih a sawi tel bawk.