76ers tan Joel Embiid a inlar

NBA Most Valuable Player ni tura rinkai Joel Embiid chuan nimin zing khan point 52 teh meuh a nei a, a team Philadelphia 76ers chu Boston Celtics lakah 103-101 in hnehna a chanpui.

Kum 26 mi Embiid hian basketball inelna sang berah hian vawi nga chu match khata point 50 neih tlin a nei ta, hnehna an chan hnuah Philadelphia coach Doc Rivers chuan Embiid chu tun season MVP a nih a rin thu a sawi chhuak.

Rivers chuan, "Ṭan lam ka nei bik pawh a ni mai thei, mahse ka ngaihdan chuan MVP ni tur chu a chiang tawh. Tih sual tam tak chu kan nei ve ngei mai, amaherawhchu Joel kan khelh tir dan hi chu kan ti dik," tiin a sawi.

An chak loh avangin Celtics tan Eastern Conference hmahruaitu nihna a tawp tluk a ni, a chung bera awm tur chuan an hmabak pathuma an chak vek bakah an chunga awm Milwaukee Bucks an chetsual thung a ngai dawn.

Inkhel dangah Giannis Antetokounmpo-a triple-double (28 points, 11 rebounds and 10 assists) hmangin Milwaukee chuan Washington Wizards 140-128 in an hneh a, a chung bera an dinhmun ti chiang turin vawi khat chak bak a ngai tawh lo.

Western Conference lamah Denver Nuggets chu Houston Rockets lakah 124-103 in an chak lo, chak ni se la chuan Nuggets hi hmahruaitu an ni tlang dawn tih a chiang, mahse an chak loh avangin an nghah leh rih a ngai dawn.

Golden State Warriors chuan Oklahoma City Thunder chu 136-125 in an hneh a, an chak theih nan hian Stephen Curry-a'n point 34 a nei a, point 30 neitu Jordan Poole a thawhhlawk hle bawk.

Los Angeles Lakers pawhin Utah Jazz chu 135-133 in an hneh. LeBron James awmna team hi pasarihna an la ni rih a, playoff khel nghal turin an dinhmun a la chiang ve lo, tunah chuan play-in an khelh hmasak a ngai dawn a ni.

Playoff hi team pariatin an khel dawn, regular season an hman aṭanga a sang paruk an tling nghal ang. Hmunruak pahnih la awm chu table-a pasarihna aṭanga 10-na te chuan play-in hmangin an inchuh leh ang.