Champion lai Gujarat an ṭha

Indian Premier League-ah champion lai Gujarat Titans-in Chennai Super Kings an hneh hnuah Thawhlehni zan khan Arun Jaitley Stadium-ah Delhi Capitals chu wicket rukin an hneh.

Titans hi ṭhumvawrah an chak a, vawm hmasak an thlang. Delhi captain David Warner-a'n 37 runs siam mah se batter dang an che ṭha tawk lo a, Axar Patel-a'n 36 runs rawn siamin over 20-ah 162/8 runs chauh an tlin.

Titans bowler Rahid Khan (31/3) leh Mohammed Shami (41/3) ten wicket thum ve ve an la. Gujarat opener Wriddhiman Saha leh Shubman Gill ten 14 runs ve ve an siam tihin Anrich Nortje-a'n vawm hlum ve ve.

Captain Hadik Pandya pawhin run nga chauh a siam a, amaherawhchu hming langsar lo zawk Tamil Nadu tlangval kum 21 mi Sai Sudharsan-a'n thi loa 69 runs a siam zarah hnehna a chang. Gujarat hian 18.1 overs-ah 163/4 runs an siam a, ball 11 dah bangin wicket rukin an chak.

Zanin hian Kolkata Knight Riders leh Royal Challengers Bangalore te an inkhel ang a; April 7, Zirtawpni zanah Lucknow Super Giants leh Sunrisers Hyderabad te an inkhel leh ang.